Contrario na tur maneho respeta di un bufete di abogado serio y integro, e bufete di Croes-Wever & Ruiz ta bisti dos pechi ora ta trata nan cliente Refineria di Aruba (Rda) NV cu ta na mes momento tambe e doño di e compania Fuels Marketing & Supply Aruba (FMSA). Un rato abogado mr. Hendrik Croes ta nan amigo y ta cobra nan pa conseho y despues ta cambia pechi y ta bira nan enemigo y ta cobra otronan pa bringa contra FMSA/RDA. Ta na Aruba so un scenario asina ta posibel, pasobra na otro caminda masha ora e Orden di Abogadonan lo a interveni!
Mas trempan Refineria di Aruba, encabesa pa Ir. Richard Eman, amigo di cas di abogado Hendrik Croes, y ex miembro di Hunta di Supervision di BBA Bank, a manda un comunicado di prensa via e sistema di Gobierno di Aruba, pa aclaria cu no ta ordo nan a haya di Prome Minister Wever-Croes sino ta nan mes a opta pa busca e experticio legal di Hendrik Croes pa yuda RdA.
E Hunta di Supervision di Refineria di Aruba ta den un disputa pisa cu CITGO y ta purbando di tur forma pa kibra e contract. En bes di uza e abogado cu a prepara tur e contractnan y conoce e areglonan, ta opta pa busca un abogado pensiona cu no tin un idea di kico tabata e areglo entre e compania Mericano y Gobierno di Aruba.
Sinembargo, pruebanan cu a yega na nos for di San Nicolas ta mustra cu Hendrik Croes ta bisti dos pechi na RdA/FMSA, pasobra den e mesun rosea cu e ta cobra pa duna conseho y biaha cu e directiva constantemente pa Merca, tambe e ta atendiendo un otro caso contra e compania. Normalmente, ora un abogado ta bringando un compania, e no por tuma un caso ni acesora e mesun compania.
Pa colmo, comosifuera poco, e disputa cu e ta defendiendo contra RdA/FMSA ta precisamente di CITGO Savaneta Servicestation di e propio Rudy Croes, su mesun ruman y alabes omo di e actual Minister Presidente di nos pais. Parce cu CITGO Savaneta y FMSA ta den un disputa pa supuesto lekmento di combustibel na e stacion y esun ta demandando e otro. E abogado cu ta representando Rudy Croes ta su mesun ruman mr. Hendrik Croes.
Ta asina obvio cu reglanan di bon gobernacion y di fatsoen no ta aplicabel mes den RdA ni FMSA despues cu a bin cambio di Hunta di Supervision aki cu ta permiti pa decisionnan cu no ta cuadra cu reglanan moderno di integridad y bon gobernacion. Famia directo, manera tata y famia mas leu, manera ta un Primo, tur ta haya trabou den RdA cu salario barbario, mientras cu Gobierno tin un plan cla riba mesa pa kita decenas di ambtenaar for di trabou.
Cu e decision aki, awor RdA ta uzando e mesun abogado cu ta bringa nan den un caso cu Savaneta Service Station tin contra nan, pa ta nan consehero awor den e caso contra CITGO Petroleum.
Parlamento tin un trabou di supervision importante pa haci aki den cuadro di supervision di e rol cu Gobierno y Ministernan ta hunga den companianan estatal. Asina aki ta un forma legal pa saca fondonan grandi di e companianan na famia of conocinan di cerca di e mandatario responsabel pa RdA y FMSA.
