Abogado: Gobierno no tin confiansa den directiva di Lotto

Pa Gobierno, henter e discusion di retiro di e Hunta di Supervision di Fundacion Lotto pa Deporte (FLPD) ta un asunto di confiansa y cu tin di haber cu e cultura politico di nos islanan aki banda. E ta masha normal cu ora un Gobierno nobo sinta, cu e ta cambia tur e miembronan di directiva den e fundacionnan y den e companianan di Gobierno pa miembronan nobo di nan confiansa. Cu FLPD a core cambia statutonan despues di eleccion, ta un asunto di mala fe, pa cual nan ta persisti pa Hues no stroba e Gobierno nobo pa tin su hendenan cu por expresa su vision den e fundacion aki.

Gobierno di Aruba, den e caso aki Minister Dangui Oduber a hinca su defensa relaciona cu e caso sumario cu Hunta di Supervision di Fundacion Lotto pa Deporte a entama contra dje den man di bufete Croes, Wever & Tchong, kendenan a apunta abogado mr. Anthony Ruiz pa presenta e caso den Corte y defende interes di Gobierno.

E abogado a ranca sali den su defensa cu un protesta pa e hecho cu e demandantenan a haci un cambio den nan demanda na ultimo ora y cu esey no por. Mester ta un dia prome. Na di dos luga, e abogado ta haya cu FLPD a bin Corte robes, nan lo mester a entama nan caso na Corte di LAR. Dor di esey, ta pidi pa declara FLPD “niet ontvankelijk”. Esaki pasobra un Minister no ta un “rechtspersoon”. Den e caso aki no tin motibo pa haci un excepcion. Na di tres luga, Gobierno ta haya cu FLPD no ta partido den e caso aki y nan no a kita nan for di trabou, sino ta nan directiva.

Abogado mr. Anthony Ruiz a repasa e hechonan den Corte y a bay te dia 25 di April 2005 ora a cambia statuto di FLPD. Ey a bisa cu miembronan di directiva no por keda mas di 8 aña.

Ora cu na November ultimo e Gabinete nobo a sinta, MEP/POR/RED y a pidi mesora na e directiva, pa boluntariamente nan tur tuma nan retiro. Ora cu nan a nenga di haci esey den forma boluntario, dia 10 di januari 2018, via un Decreto Gubernamental a retira e directiva anterior y a nombra miembronan nobo di directiva.

Gobierno ta di opinion, cu e fundacion mester por tin garantia cu e Directiva tin bon relacion y contacto cu Gobierno. Esey no ta e caso awor aki. Y cu un mal relacion, no ta na fabor di un operacion saludabel di e fundacion.

Gobierno ta sinti cu a tene e banda di e Hunta di Supervision na cuenta, a duna nan motibo suficiente dicon a kitanan. Na Aruba, asina cu tin cambio di Gobierno, cu ta cambia directivanan di e companianan y fundacionnan di Gobierno. Esaki ta normal!

Den e statutonan nobo, na ningun caminda ta poni cu Gobierno no por cambia e miembronan ora gobernacion cambia. E hecho cu ta pone cu mester tin motibo, no ta stroba Gobierno den su intencion. Den e statuto no ta specifica kico ta e motibonan. Pesey, Gobierno ta sigura cu el a actua den forma corecto y cu su decision ta balansa. Den e statuto no ta poni e articulo di “hoor en wedehoor” di e miembronan prome cu kita nan.

Gobierno a tene cuenta cu algun di e miembronan a alcansa 8 aña caba, pues no ta normal cu un solo hende kier keda 12 aña den directiva di e fundacion. E abogado di Gobierno ta sinti cu via un “gesjoemel” a logra alarga nan periodo.

Gobierno na final ta mira cu 2 luna prome cu eleccion, a cambia e statuto den forma drastico. Gobierno no ta di acuerdo cu e cambio y no ta kere cu e proceso a dura tanto aña. Gobierno ta mas na fabor di e structura manera e tabata antes, unda e tabata mas transparente. Ta sinti cu e cambio aki awo, ta beneficia tres miembro di e directiva pa por keda mas (nan mester a baha na November ultimo) y otro 2 cu otro aña mester baha.

Si acaso mes tene na consideracion pa mantene e directiva actual mes na poder, Gobierno ta teme cu tin algun cambio transcendental cu nan lo kier haci den Lotto y cu nan no ta mira cu e directiva actual lo coopera. Un di nan ta cu e Gobierno nobo no ta na fabor di e contract cu Canadian Bank Note (CBN), mientras cu e directiva aki si, pasobra ta nan mes a alarga e contract. Otro asunto, e caso cu FLPD a cuminsa, uzando un rapport di Ernst & Young, pa pinta Endy Croes preto y persigui’e. Esaki ta un motibo tambe cu Gobierno no kier sigui traha cu e grupo aki.

Mester menciona cu na dado momento, na final di e tratamento, Hues a cuestiona e maneho di Gobierno formalmente, puntrando e abogado con e sa cu e directiva nobo no lo sigui e ordo di Gobierno, si nunca a sinta cu nan ainda. E abogado a referi na decisionnan cu nan a tuma den pasado. E Magistrado a bolbe puntra e abogado cu si e ta referi na decisionnan cu e directiva a tuma durante signatura di otro Gobierno, cu e kier aplica esey awo, siendo nan no a ni papia cu e Minister nobo ainda. Sacudiendo cabes e Hues a bisa cu e ta cera tratamento di e caso y lo tuma un decision dia 7 di februari 2018.