Dialuna mainta a inicia tratamento di e caso sumario cu e Hunta di Supervision di Stichting Fundacion Lotto pa Deporte a entama contra Gobierno di Aruba y Minister Dangui Oduber. E caso ta pa pidi Hues pa suspende e decision pa retira e Hunta di Supervision existente y suspende e decision pa nombra miembronan nobo den e Hunta di Supervision. Mas ainda e caso ta pa prohibi Gobierno pa stroba bon funcionamento di e Hunta di Supervision, mientras cu e caso ta sigui su caminda den “bodem procedure”.
Abogado mr. Brechtje Huiskes y mr. Frank Kunneman a defende e miembronan di e Hunta di Supervision di Stichting Fundacion Lotto pa Deporte. Nan a cuminsa nan defensa bisando cu Gobierno a demostra claramente cu nan no ta respeta Corte, pasobra no obstante cu a manda nan carta y informa cu a cuminsa un caso sumario; no obstante cu nan a haya fecha pa tratamento di e caso urgente pidiendo un “orde maatregel”, cu toch Gobierno a opta pa core nombra e directiva nobo riba e mesun dia cu Hues a prohibi nan di haci tal. Abogado defensor di e Hunta di Supervision di Fundacion Lotto pa Deporte (FLPD) ta considera e hecho aki como uno di mala fe.
Durante su defensa, abogado mr. Huiskes a subraya cu Minister Dangui Oduber a nenga e peticion pa reunion di e Hunta di Supervision of no a duna nan e reunion cu a pidi, pero si a recori na lastra nan den media durante e ultimo 2 lunanan, acusando nan y insinuando un cantidad di ponencianan cu no ta cuadra cu berdad. E Hunta di Supervision a sigura Corte cu nan kier sinta cu Gobierno y kier yega na solucion den un bon ambiente.
E punto principal den e caso aki ta e normanan di “Corporate Governance” cu FLPD a implementa y a pone den funcion. Pa por a cumpli cu e reglanan aki, a opta pa cambia statuto, den cual Minister no tin e rol mas di controla e trabou diario di e fundacion. Berdad si ta cu e Minister tin e poder pa pone y kita e Raad van Toezicht, pero mester tin motibonan valido. E Hunta di Supervision no ta considera cambio di gobernacion como un motibo relevante pa kita nan for di nan puesto.
Prome cu a baha como Minister, Minister Dr. Alex Schwengle a logra un acuerdo cu tur instancia den deporte pa implementa un codigo general, yama “Code of Ethics” den e sector di deporte, di cual partnernan a firma e acuerdo aki, entre nan Fundacion Lotto pa Deporte. E fundacion como tal ta para riba su mes y no ta mara na Gobierno, no ta haya placa di Gobierno y e Minister no tin control directo riba e fundacion. Den e structura nobo, e Minister mester respeta e independencia di e fundacion
Durante tratamento di e caso a splica Hues mr. Sap cu for di aña 2010 a cuminsa e proceso pa adapta statutonan. Na 2011 nan a scoge pa e structura dualistico, esta di un “Raad van Toezicht” cu ta controla e “Raad van Bestuur”. Corporate Governance ta un trend den desaroyo, pa cual ta rekeri cambionan regular pa garantisa independencia, transparencia y bon gobernacion den fundacionnan. Despues di a ricibi conseho di abogadonan, huristanan, accountant y di notarionan, na Juli 2017 e directiva a aproba e cambionan y na October 2017 Notario Yarzagaray a oficialisa e cambio.
Na final e abogado a reitera cu e retironan como tal ta inhusto y ilegal. No a scucha nan prome y e Minister a uza su poder di retira directiva di forma robes. E Hunta di Supervision di FLPD a pidi Hues pa suspende e retiro inmediato aki, pendiente e caso den ‘bodem-procedure’ cu a entrega caba. Ta pidi pa suspende e nombracion di e directiva nobo y pa permiti e directiva actual sigui traha te ora Corte dicidi otro. Ta pidi un dwangsom di 10 mil florin pa dia of pa cada parti dia cu no cumpli cu e decision di Corte.
Hues mr. Sap a bisa na final di tratamento cu dia 7 di februari 2018 e lo anuncia su decision den e caso sumario aki.
