Edwina Henriquez, Abogado di Derechonan Humano y Democratisacion, a manda un carta pa Prome Minister di Hulanda Mark Rutte den cual e ta expresa su preocupacion pa e forma di actua di funcionarionan policial durante e toque de queda. Un situacion cu e ta haya alarmante y cu e uzo di violencia ta innecesario.
Den e carta e Abogado ta expresa su mes specificamente pa mantencion di toque de queda den oranan di anochi unda cu ta detene personanan di edad y menornan di edad dilanti di nan cas; ta pone nan den boei pa hiba Warda di Polis,unda cu ta haya un boet basta pisa.
E ta papia di exceso policial y ta duna e ehempel e caso di dos hende muhe deteni den nan cura di cas y maltrata, pa despues boeinan y pone nan den un dogcatcher.
Loading…
Reload document 
Open in new tab El a cuestion con dia 22 di maart Fiscal Yolanda Pronk ta bisa cu e hendenan por ta den nan cura di cas, mientras cu un dia despues caba e cura cu ta rondona e cas ta bira un area publico unda cu polis por detene un persona. “Polis por viola integridad di bo cas durante toque de queda y cu e gobierno por goberna segun un decreto. ….”
E ta mustra cu Prome Minister ta cambia ley, cu ta viola derechonan fundamental di ciudadanonan via di un decreto ministerial. Dia 22 di maart un señora a bay tira su saconan di sushi pafo y a keda deteni, hinca den un dogcatcher yen di hende; dia 25 di maart a detene un homber demente di edad riba caya, tambe a pone den boei. E otro ehempel cu e ta duna, di un señora deteni ora cu el a tira un hemchi cu awa sushi pafo. E yiunan paden cu a mira loke a pasa, a sali na careda bin pafo y nan tambe a keda deteni. Total 4 mil florin di boet pa un solo famia. Dia 28 di maart un señora di edad bisti cu yapon aresta dilanti su cas y na yoramento a bay cun’e
Ta papia di un homber edad aresta den su cura, lastra hiba den su cas, maltrata y despues hiba warda. El a keda cu un corta (cap) den su cabes. El a conta den e carta cu dia 30 di maart Comisario Interino di Polis Vanessa Tjon-Kock na un manera fresco a bisa na television cu dos biaha polis a bay eynan, door di musica halto. E homber di edad no tabata kier a bay cu Polis. E funcionario policial a bisa cu ciudadanonan haya riba caya ta wordo atendi cu man fuerte. Pero e Abogado ta bisa cu no ta trata aki di personanan cu ta detene riba caya, pero den nan mesun cas, dilanti di nan cas y den nan cura.
E ta bisa cu ta parce cu Comisario Vanessa Kock no ta na altura cu derechonan humano mester keda garantisa durante toque de queda.
Di e forma aki e tabata kier a pone e mandatario na altura di e excesonan di actuacion policial durante toque de queda. El a enfatisa cu e no ta contra toque de queda, pero ta vigila di cerca e exceso di actuacion policial pa violacion di derechonan humano.
