Awe den oranan di mainta Hues a bishita dump di Parkietenbos pa mira cu su propio wowo e situacion reinante y e incinerator cu ta papiando di dje.
Paden tabata presente tambe funcionarionan di Departamento di Obra Publico (DOW), Serlimar y Departamento di Medio Ambiente y Naturaleza (DNM). “E tabata miho di loke mi a pensa. A contesta hopi pregunta y a haya informacion di e parti tecnico di e problema,” Abogado mr. Desiree Croes a bisa,
Anouk Balentina, kende ta biba den bisindario di dump a cuminsa un caso den Corte, unda ta pidi pa para tur operacion di dump,mirando con esaki ta afecta nan calidad di bida.
Paden e partidonan a haya chens pa haci hopi pregunta na e partidonan envolvi cu DUMP su operacion pero tambe relaciona cu e incinerator. A haci e pregunta principal pakico ta sigui cu dump eynan y sigui cu incinerator, pero no a logra haya un contesta satisfactorio. Esaki basa riba e conseho pa descontinua cu operacion di dump na e sitio ey.
Hues y tur e partidonan envolvi tabatin pregunta, manera e tipo di gasnan cu ta emiti y ki peligro nan ta pa salud exponi na esaki pa periodonan largo.
A sali na cla cu Serlimar kier bay test e incinerator pero nan no tin e “hindervergunning” cual ta un punto cu sigur Abogado Croes a bisa cu e lo trece dilanti bek durante continuacion tratamento di e caso. A duna hopi splicacion “pero nan no a convence nos,” Croes a bisa. Pasobra a constata cu ora biento cambia, cual sa sosode regularmente na Aruba, lo mester para operacion di e mashin.
No a haya ningun siguransa cu loke ta tumando luga riba dump ta “safe” pa e habitantenan di e bario, principalmente tambe ora cuminsa cu operacion di e incinerator. A test e mashin tres biaha caba kimando karkas y restonan medicinal. A puntra tambe di con no a haci e test na RDA enbes na un sitio cu ta keda meymey di e bario.
Despues di dump, a bishita cas di Anouk Balentina y tambe e instalacionnan di EcoGas.