Dialuna a tuma luga e caso sumario contra suspension di e Director di Departamento di Salubridad Publico, drs. Jerry Staring. El a haya un carta unda cu a prohibi su entrada na trabou, firma pa Minister Dangui Oduber. Abogado Bryan Coffie di Bufete Gomez Coffie (ex Gomez & Bikker) a defende Gobierno den e caso aki. “Ta bon pa bisa bon cla pa no tin duda cu e caso aki no ta trata di un suspension, ta un toegangsontzegging, un medida caminda cu tin un investigacion andando”, asina e abogado a bisa despues di tratamento di e caso. Lo dicta sentencia dia 6 di juli.
Motibo
Motibo ta cu tin un investigacion cu ta wordo haci. Normalmente esey por dura seis siman, manera cu e Minister a menciona durante e conferencia di prensa y un investigacion asina por wordo prolonga cu seis siman mas, den dado caso cu ta necesario. Awor aki esey ta e motibo cu sr. Staring a bin corte hunto cu su abogado, pa pidi pa Hues suspende e ordemaatregel cu a wordo tuma, cual ta nada otro cu un medida di orden. No ta un suspension. E no ta un accion disciplinario y ta djis un tempo mester wordo duna pa un investigacion wordo haci, pa asina e resultadonan di e investigacion ey wordo divulga, prome cu duna cualkier remarca riba e investigacion.
No por divulga nada mas riba dje
Ora ta trata di un toegangsontzegging, ta pa e investigacion wordo haci den tur trankilidad y cu den ningun forma cu e investigacion wordo influencia. No ta rekeri pa ley pa scucha e persona den hoor en wedehoor. Den e caso aki tabatin combersacionnan cu a tuma luga, cual e abogado no a bay mucho den detaye.
