Abogado: Biaheronan di Surinam no a haya informacion pa declara placa

Siman pasa a sali un relato unda a bay over na detene dos biahero procedente di Surinam na aeropuerto debi cu supuestamente no a cumpli cu nan obligacion pa declara cu nan a biaha cu mas di US $10.000,-/ Afl. 20.000,- cash.

A laga e dos biaheronan nan aki den libertad despues di mester a paga un boet.

Oficina di abogado David Kock a remarca cu loke a publica, ta solamente un banda di medaya y a pone e dos biaheronan aki bou di un nubia scur. Loke no a menciona ta cu e dos biaheronan aki tabata bin di un vuelo fo’i Merca cu destino Surinam via Aruba como transito. Ora di sali fo’i Merca, e biaheronan a cumpli cu nan obligacion di declara e placa na Merca y ora a yega Aruba a haya nan mes confronta cu un problema cu e avion cu escala na Aruba pa Surinam a cancela. 

E biaheronan a puntra na aeropuerto si nan mester declara e placa cu nan tin, mirando cu na aeropuerto no tin borchi ningun caminda si mester haci esaki y si esaki ta e caso, na unda lo mester haci esaki. 

Na aeropuerto a informa e dos biaheronan cu mirando cu nan ta den transito, nan no mester declara e placa aki. 

Un rato despues a notifica cu e vuelo tin problema y cu nan lo mester pasa un anochi na Aruba y e vuelo lo sali su siguiente dia. A dirigi e biaheronan, hunto cu un grupo na un hotel, unda nan a pasa un anochi y pa su siguiente dia a bay aeropuerto pa tuma nan vuelo pa Surinam. 

Aki un biaha mas a puntra na aeropuerto si nan mester declara e placa cu nan tin. Pero a informa nan cu no ta necesario.

Ora a yega checkpoint, atrobe a indica cu tin suma di placa cu nan. Na e momento aki, a escolta e biaheronan aki y a bay over na detencion.

Lamentablemente Ministerio Publico no a tene cuenta cu esaki, mirando cu tur hende na aeropuerto a indica cu e biaheronan nunca a puntra si lo mester declara. Esaki tabata tin consecuencia grave pa e dos biaheronan. No solamente e hecho cu nan a keda deteni pa dos dia sin tin mester pa interogacion, pero tambe pa e simpel hecho cu a implementa un boet, sin tene tur e detaye nan aki na cuenta. A uza e implementacion di e boetnan aki den forma di cuchiu na garganta, cu ta haci cu si no bay over na paga e boet, e persona ta hay’e obliga di keda deteni paar di dia mas inhustamente. 

E situacion cu a presenta su mes no tabata solamente uno desagradabel pa e dos biaheronan, cu a keda cu un sabor amargo, pero tambe ta fungi como un advertencia pa otro biahero pa tene bon cuenta esaki.