Contrario na ponencia di Ministerio Publico den caso IBIS, unda a papia di un “ontheffingsfabriek” pa ex-Minister Paul Croes enrikese su mes, awe abogado defensor, mr. Marije Vaders a desbarata e ponencia aki for di mesa.

Na inicio di su defensa el a trece padilanti cu cifranan oficial di DPL pa por hinca e discucion den e contexto real y e perspectiva corecto, sin cu mester crea un percepcion robes den publico. Defensa ta sinti cu Fiscal a haci su best pa haci comosifuera e caso ta hopi mas grandi di loke enrealidad e ta.

“Na aña 2016 un total di 895 compania a acerca DPL of Minister cu un of otro peticion. Di e total aki apenas 13 di esakinan Paul Croes a acerca pa cumpra tickets pa e concierto di Pasco cu e ta organisa hunto cu su Fundacion Leadership & Excellence. Esaki ta representa 1.4% di e total di companianan cu a haci un peticion”. Banda di esaki un caso cu a cuminsa papiando di centenares di Ontheffing, awe Fiscal a papia di “tientallen”.

Abogado mr. Marije Vaders para cu su clientenan Melony Croes-Paeach y ex Minister Paul Croes

Abogado Vaders a mustra cu e forma cu Ministerio Publico a presenta e caso aki for di inicio dia 28 di Maart 2017 ya caba bo por bisa cu su cliente a wordo condena. “Un proceso inhusto cu for di inicio caba bo a influencia tur sospechoso y testigo”, asina abogado Vaders a bisa Hues awe mainta. Ministerio Publico a saca tur informacion pafo prome cu su cliente mes (Paul Croes) tabata sa di algo.

Banda di esaki e abogado a mustra cu bou di maneho di ex-Minister Paul Croes desempleo juist a baha enbez di subi. Ta con e ora e Ex-Minister a perhudica e trahadonan local si pa tres aña consecutivo desempleo a baha na Aruba? Aki defensa a entrega Hues prueba di e cifranan di desempleo pa Aruba di e añanan 2013 – 2016.

Comments

comments