Aeropuerto Internacional Reina Beatrix ta opera pa mas cu dos luna caba desde frontera a habri. Pocopoco mas avion a
cuminsa yega, pero tambe nan a ricibi e noticia cu desde 19 di november Jetblue lo tin un ruta mas diario y nobo. Esaki ta bin for di New York y ta conecta Newark pa Aruba.
E vuelo ta sali pa 9:00am for di Newark y yega Aruba pa 3:00PM. E salida lo ta pa 4:10PM y pasaheronan ta yega nan destinacion pa 8:15PM. E ta algo alentador pasobra New York ta keda un di e mercadonan grandi.
Jo-Anne Meaux-Arends, Air Service Development Manager di Aruba Airport Authority a bisa cu nan ta contento cu JetBlue tin confiansa den e destinacion di Aruba y rebuild e network cu tabatin.
Pocopoco na juni a cuminsa pone vuelonan acerca y diariamente tin ocho pa nuebe vuelo, aunke e por varia. E dianan di menos trafico ta diamars y diaranson, di cual tin dos of tres vuelo di Merca. P’e
parti di fin di siman semper ta keda druk y tin dies pa diesun vuelo.
Prome cu COVID tabatin vuelonan di Avianca, Copa y Wingo. Segun Meaux-Arends, informacion cu tin ta cu Colombia ta bay cuminsa cu vuelonan internacional y Panama tambe. Aruba no ta cla ainda p’esey y mester warda pa anuncia oficialmente cu ta habri fronteranan.
E decision aki ta di crisis beleids team y gobierno, pero no ta den man di aeropuerto. Asina gobierno y aeropuerto ta cla pa habri fronteranan, tin Avianca, Copa, Wingo programa pa vuelonan na november y december.
Latino America ta algo hopi sensativo y e ta kere cu tin diferente protocol, manera a pasa cu e parti Mericano. Meaux-Arends a splica cu e parti ey a bay hopi bon y a haya hopi feedback positivo for di
aerolineanan. Nan ta keda mira Aruba como un ehempel. Den e prome luna aeropuerto a ricibi mas of menos 10 mil pasahero, e di dos luna tabata mas of menos 21 mil.
