A yama y guia Polis pa perhudica tiradonan di pisca na Arashi

6605

Dos homber cu a baha via baranca den lama na Arashi y landa bay afo, a keda perhudica y persigui pa Polis. Un hende cu si tin cuminda na cas y placa pa come a yama Polis y a keda guia Polis te ora cu el a logra su meta completo. Polisnan a chek delaster un number di auto den e area pa mira si por yega na e dos personanan cu a drenta lama bay un kilometer pafo pa tira pisca. A saca boto di Polis cu a bin full speed pa persigui e tiradonan di pisca cu ta den e lama algun 100 meter leu pa tira pisca pa nan cas.

Di mes mescos cu cualkier otro tirado di pisca, nan tambe a manda nan speargun bay den fondo di lama y a regresa tera man bashi. A topa cu dos persona cu a sali for di awa pero leu for di otro. Polis a tuma nan datonan y a sigui investiga. Esun banda di lama cu a yama Polis a sigui insisti y a mustra Polis unda mas o menos nan a laga e dos speargunnan bay den fondo di lama. Polisnan Maritimo a duik te cu a bin topa cu un speargun den fondo di lama. A confisk’e y bay cu ne den beslag.

Keto bay ta wardando Minister Andin Bikker y Minister Chris Romero cu dies dia pasa a bolbe duna un speransa falso na e tiradonan di pisca cu awe, mescos cu miles di hende, ta sin placa y sin cuminda. E mesun dos Ministernan cu pa añanan largo, tempo tabata Parlamentario, a uza y gaña tiradonan di pisca den tur forma cu lo soluciona nan problema. Awe despues di casi tres aña gobernando nada a sosode!