A yama Polis pa nan: Contratista no kier tene su mes na reglanan di siguridad na Hospital

No a keda Hospital otro solucion awe cu yama Polis pa intermedia riba nan mesun tereno contra nan contratista. E ultimonan aki kier subi tereno cu nan mesun cuerpo di siguridad y sin tene nan mes na reglanan di siguridad impone pa Dienst Technische Inspectie (DTI) relaciona cu trabounan cu asbest. Hospital ta fada cu e contratista no ta respeta nan decisionnan.

E relacion entre Dr. Horacio E. Oduber Hospital (HOH) y Stichting Onroerend Goed Aruba (SOGA) cada dia ta empeora. Tur dia ta birando mas cla e trabou deficiente cu e contratista Mericano, paga cu placa di SOGA ta desplegando riba e edificio bieu y nobo di nos Hospital. E eror reciente cu asbest y candela a hinca Hospital den un problema mas grandi cu a spera, cu hunto cu e crisis di Covid-19, ta haciendo funcionamento di e centro di cuido hopi dificil y colma pa retonan tras di otro. 

Tin indicacion cu e contratista kier cana den e area unda tin asbest, pues e hotzone, cu no mag di drenta pa siguridad. Nan ta drenta sali den e area unda tin asbet, sin ekipo y vestuario adecua. Claro cu esey no ta responsabel y Hospital a hay’e ta tuma medidanan drastico contra e contratista di SOGA. Parce cu DTI a impone reglanan masha estricto pa tur hende cu ta subi e tereno di construccion, specialmente cerca di e area unda a topa cu asbest. Asina mes e contratista, na un forma delibera, ta sigui acerca y subi e area comosifuera e ta un parti normal di e trabounan di construccion y renobacion riba tereno di Hospital

Mientras cu SOGA ta sigui den un bataya pisa cu Hospital, na final esun perhudica ta keda e pashentnan! Contratistanan cu no ta tuma medidanan di siguridad adecua na Hospital por forma un peliger serio pa salud den e area. Kisas no ta tene suficiente cuenta cu den Hospital ta hende malo tin, ta pashentnan cu mester atencion y extra cuido y cu mester ta extra cauteloso pa presencia di asbest. No por ta asina cu Hospital ta evita bishita di afo pa no importa problema y riba nan mesun tereno contratistanan ta subi y baha tereno cu asbest sin proteccion. 

Por corda cu retonan entre SOGA y Hospital ta pasando pa tres Minister caba! A start cu dr. Richard Visser den e proceso di contract y preparacion. A sigui cu reto tras di otro durante gobernacion di dr. Alex Schwengle y awor Minister Dangui Oduber ta siguiendo cu e mesun retonan tur dia tras di otro. Fayonan den construccion, erornan grave, problema cu awa, holor di diesel, gas, huma, schimmel y awo hasta huma y asbest, ta pone cu na Hospital nan ta den un status di “never a dull moment”. Tin trabou pa Minister Dangui Oduber den esaki, kende ta esun cu tin contract cu SOGA, responsabel pa e financiamento, construccion y mantencion di e edificio pa 20 aña largo.