“Nos mester sigui riba e ritmo aki di vacuna y registra”, asina minister Dangui Oduber a menciona awe nochi. E ta masha contento con e dia a bay awe, den cual un grupo grandi di adultonan mayor, riba 60 aña di edad, a vacuna y ta cla pa preveni Coronavirus.
“Nos a cuminsa cu e pre registro pa vacuna dia 1 di februari 2021. Awe cu nos ta 5 siman despues nos a yega casi 25% di nos poblacion registra”, segun e minister di salud publico, turismo y deporte a enfatisa. Ta un trabou inmenso e personal di DVG y otro instancianan di gobierno ta haciendo pa por organisa e accion di registro y vacunacion na varios punto rond di nos isla.
“Awe nos a sigui vacuna mas di 1000 persona riba 60 aña di edad. Si bo mayornan, welonan of conocinan riba 60 aña di edad ainda no a registra, yuda nan registra via e Aruba Health App of pasa cu nan na un di e MFA nan”, di acuerdo cu minister Oduber.
Te cu awe a vacuna no menos di 8.882 ciudadano. Na tur a registra 24.324 ciudadano, di cual 10.767 ta personanan 60 plussers. Di e grupo riba 60 aña di edad, orguyosamente a vacuna 7.365 perona caba.
“Aruba, ban sigui vacuna pa salba bida y progresa”, asina minister Dangui Oduber a termina bisando.