Investigacion preliminar ta mustra cu tabatin un fiesta di hoben, cu wega di hoben, alcohol na abundancia, esun a reta e otro y cu un final fatal. Awo tur kier culpa otro, menos realisa cu nan acto iresponsabel awe a costa bida di nan amigo.
Investigacion preliminar y basa riba e prome declaracion di amigonan na Spoedeisende Hulp na Dr. Horacio E. Oduber Hospital, ta indica cu e victima a sali cas sin cu su mama y tata tabata sa. Parce cu e ultimonan aki a kita su auto for di dje pasobra a constata cu e tabata burachi.
Amigonan a pasa busc’e na cas y nan a bay sigui fiesta na un cas cu e amigonan a huur na Palm Beach. Ey a dicidi di hunga challenge cuanto minuut nan por wanta bou di awa den piscina.
E “amigonan” a lag’e basta rato bou awa. Despues nan a sac’e pero ya tabata laat. Nan a yama ambulance pero no a warda y nan mes a dicidi di transporta Daniel morto mes den auto. E nursenan a sali pafo y a cuminsa reanima e victima den auto mes. A trece paden hunto cu dokter, pero ya e tabata biña caba. A reanima basta largo den SEH pero su curason no kier a bin bek. Pa 6:42 am dokter a declar’e morto.
Asina cu polis a yega y a informa di e suceso y cu tin declaracionnan contradictorio, a opta pa tuma e curpa mesora den beslag. Anatoom pataloog lo mester haci un investigacion pa saca afo, medicamente, con e hoben a fayece y si por tin agresion of kico el a bebe, huma of uza den e proceso.
Mester menciona cu na hospital, recherchenan investigando e caso a nota mesora cu e amigonan kier a laba man door di gaña cu ta e nursenan di hospital a reacciona laat. Nan hasta a bringa cu security na hospital. Sinembargo, un di e amigonan mes a basha bou, ora cu e berdad y realidad a bati na nan porta.
E investigacion ta continua awo, pa scucha version di tur e invitadonan na e fiesta. Mester sigura cu tur e declaracionnan ta cuadra, pa por yega na e version real di con Daniel a fayece y pa sigura cu no tin nada otro cu a sosode na e sitio cu por a causa su morto. Hopi forsa na e mayornan y famia, cu a keda atras den tristeza awo.
