A trata caso contra Parlamentario Luigi Bergen awe

Mientras cu Luigi Bergen a bandona oficina di Ministerio Publico sin kier bisa nada di loke a pasa paden, su ex casa Melissa Kock y yiu muhe Xaedynn Bergen a keda hopi rabia pa e actitud di Bergen y a bisa cu mensahe di Ministerio Publico tabata cu e caso ta bay un TOM-Zitting y si e no ta cumpli ta mand’e dilanti mesa berde.

“Mi tata a maltratami y awo e kier bin limpia su nomber y haci comosifuera e no a haci nada,” tabata e prome comentario di Xaedynn Bergen despues cu Fiscal a atende cu nan. E caso aki ta hopi controversial pasobra Bergen, kende ta Parlamentario, a bisa cu e ta “limpi” y no tin ningun caso contra dje. Sinembargo oranan despues di e declaracion aki, e yiu a saca un bom bisando cu Ministerio Publico a manda yama Luigi Bergen pa contesta acusacionnan di maltrato fisico cometi riba su mesun yiu muhe y di cual e pruebanan a wordo recogi door di e instancianan concerni.

A trata caso contra Parlamentario Luigi Bergen awe

A trata caso contra Parlamentario Luigi Bergen awe. Click e link pa mas https://24ora.news/2O0HXtD

Posted by 24ora on Tuesday, November 19, 2019

Awe mainta 11’or a cita Bergen na Ministerio Publico y na su salida su unico comentario riba e sospechonan contra su persona ta: “Bo mester entrevista esnan cu a horta cosnan di Polis” y despues a subi su auto. E caso eyden a keda posponi, ya cu e yiu y su mama mester trece algun documento adicional pa e parti civil di daño y perhuicio. Pero e hoben ta sigura cu e tata a chok’e. Lagand’e cu marca tur biña na su garganta. Personanan concerni di scol mes a dicidi di aserca Fundacion Sostenemi pa denuncia e caso.

Cu tur esaki den pipa pa yega sea na Corte of un TOM-Zitting, e ex casa di  Parlamentario Bergen no por caba di compronde con por ta posibel cu asina mes, el a haya su carta di bon conducta. “A yega momento pa break the ice. No ta importa kende bo ta. Bo por ta Minister mes, pero ora cu bo comete un acto, para den bo sapatonan manera un homber”. 
Bergen, segun Melissa Kock, a insisti pa finalisa cu e caso e momento ey, mientras cu Fiscal a bisa cu mester haya mas informacion.

“E no ta ni realisa cu el a comete un daño y awor kier haci manera nada  pasa. Mi a keda keto pa basta tempo pasobra e ta un politico. Pero mi mester a bisa ta basta. Awe ta Dia di Hende Homber, pero lamentablemente nos mester pasa den cosnan asina. Mi ta para firme den loke mi ta kere aden y mi ta kere cu mi yiu merece husticia,” Kock a expresa. Loke cu nan tin cu haci awo, ta trece mas documento  como prueba di e caso aki.


Loke cu a tuma luga awe diamars tabata manera un TOM-Zitting, pero ta parce cu ta evaluando pa e caso bay Corte mes awo, mirando tur informacionnan cu ta bini dilanti. E yiu muhe a bisa tambe cu tabata hopi dificil cu e mester a acudi na Ministerio Publico, ya cu niun yiu lo kier bay contra di su propio tata. Pero, el a sigui bisa, ta hopi inhusticia a bin ta tumando luga contra dje y su mama di parti di Luigi Bergen.

Di tur loke a pasa y ta pasando, e ta haya e impresion cu su tata kier pa su mama bay cera. “Mi ta kere cu ta e mester bay cera. Mi mama nunca a haci algo contra mi. Pa motibo di mi tata mi a perde un aña di scol y el a maltratami cu ainda mi ta sinti e trauma. Tin biaha ora cu mi papia di e cosnan aki mi ta yora. Hasta mi ta haya gana di mata mi curpa. E ta dificil pa enfrenta mi tata, pero mi a haya curashi pa haci esaki awo.”

E mama di su banda a bisa cu e caso a cuminsa lora na momento cu scol a raporta e maltrata na Buro Sostenemi, debi na marcanan visibel di maltrato. “Tur cos a wordo gedek debi na kende ta na mando…Mi ta sinti cu no tin husticia…Con por ta cu un Hues ta mandami cera mi boca y ta laga e si papia. Mi ta desea un Hues imparcial, di Corsou, cu mi tin derecho pa pidi, mirando cu bo mesun hendenan di Aruba ta boycotea nos.” E yiu di su banda a bisa cu “caminda cu tin politico y placa, tin fraude y man sushi semper.”  E ta kere cu su tata tabatin e potencialnan pa politica, pero loke el a demostra cu e falta ta integridad, hustamente loke cu Gobierno ta promove. “Unda su integridad a keda….el a core sconde y no por para den su sapato, mira con el a core pa entrevista.”

Loader Loading…
EAD Logo Taking too long?

Reload Reload document
| Open Open in new tab

Download [591.58 KB]

Ta basta na burocracia, ta basta na tur cos, pasobra ta 25 aña el a pasa den e situacion aki, e mama na final di e entrevista a bisa. Y a bisa cu si tin hende cu kier reclama algo, nan mester sa e bida “cu mi a biba y e ora nan por huzgami.”