A start investigacion contra Polis envolvi den accidente

Den fin di siman a sali informacion di un accidente den cual un V-Wagen gehuur dor di Cuerpo Policial Aruba tabata envolvi. Ta menciona cu na wiel tabatin Hoofdagent di Polis, Alex Pieters, kende na mas di un ocacion a yega di sali den prensa relaciona cu e departamento di Examen Rijbewijs y pa e unidad motorisa di Cuerpo Policial Aruba.

Den comunidad a cuestiona e silencio di e cuerpo relaciona cu e accidente aki y na por lo menos un noticiero di radio, a cuestiona hasta Minister Andin Bikker pa ta permiti e tipo di asuntonan asina sosode den e cuerpo di Polis. Ta insinuando cu e Polis envolvi lo a bisa cu e ta malo y a pidi mesora pa un Ambulance, pa evita cu e mester pasa dor di e proceso di control y pa supla.

Awe Alto Comisario Andrew Hoo a confirma cu e informacionnan ey a yega na su conocemento tambe, pa cual a pidi tur e rapportnan di Polis y di TRS relaciona cu e incidente. E resultado preliminar a conduci na start un investigacion interno contra Pieters, pa verifica si tur procedura a cana manera mester ta ora cu tin un Polis envolvi den un accidente di auto.

Mando Policial a confirma cu no a prohibi entrada di e Polis den edificionan di Cuerpo Policial Aruba manera sa haci normalmente ora cu ta investigando un Polis. Esaki ta pa evita cu su presencia ta stroba e investigacion of si e por influencia otronan cu mester testigua den e investigacion.

Mester menciona cu ainda no por papia di culpabilidad pasobra e investigacion andando lo mester bay demostra esaki. Te cu awor ta kehonan cu a drenta, kisas di cierto di su coleganan, bisando cu a evita cu e ta “test” e nivel di alcohol den su rosea, dor di mande Hospital mesora.

E tendencia di purba “burla” of “scapa” di e controlnan aki ta birando popular, specialmente despues cu ex Polis y actual Minister Plenipotenciario Guilfred Besaril a bandona sitio di accidente, lagando su pareha atras. Tambe el a sosode algun dia pasa cu un locutor di radio afilia na e mesun partido di Minister Andin Bikker (POR) cu tambe a bandona e sitio y scapa control.

Den Polis mes a informa nos cu na momento di un accidente, si e chauffeur ta burachi of no, si e ta herida, su salud ta bay prome. Pues ora un persona resulta herida den un desgracia, nan no ta puntra prome si e ta bebi, sino ta pidi ambulance mesora pa hib’e Hospital. Ta den casonan extremo, den cual partidonan ta resulta critico of fatal, ta opta pa haci e prueba di sanger di e causante di un accidente di trafico. Di otro forma e ta dificil pa haci testnan na Hospital, pasobra Polis no tin autoridad of hurisdiccion den Hospital, pasobra eyden privacidad di pashent ta bay prome. Pues no por djis bisa cu pasobra ta un Polis e forma di traha mester ta diferente, den caso di un desgracia cu herido.

 

Comments

comments