A skirbi “BOMB” riba stoel den avion di Jet Blue

341

Awe merdia 1:25pm a yega Aruba e vuelo di Jet Blue for di Merca. Na momento cu e pasaheronan a baha for di avion y cu e compania di limpiesa a aborda e avion pa haci limpi, nan a topa cu un mensahe skirbi cu color di ink blauw “BOMB” riba un stoel den e avion. Mesora nan a informa Polis di Aeropuerto cu a bati alarma, di acuerdo cu e plan di contingencia na momento di un alarma di bom riba avion. Altocomisario Andrew Hoo a confirma cu no tin detencion ainda relaciona cu e informe aki, pero ta investigando ken of kendenan por a laga e mensahe ey atras den e avion.

Dor di e acto aki, e pasaheronan cu tabata na gate # 6 cla pa aborda e avion pa bay Merca, tampoco por a subi. Na momento cu Polis a informa demas autoridadnan competente di e carta aki, a aplica e “draaiboek” relaciona cu bommelding na Aeropuerto. Consecuentemente Cuerpo di Bombero ta activa mesora, Koninklijke Marechausee di Marina Real ta bin cu su expertonan di bom, hunto cu Polis, mientras cu e coordinacion general ta bay den man di Departamento di Calamidad.

Den entrevista exclusivo cu Altocomisario di Polis for di Aeropuerto, el a corda tur hende cu bommelding no ta un chansa. Esun cu haci su mes culpabel na e crimen aki, ta enfrenta castigo di prizon halto. E consecuencianan despues di un melding asina ta grandi, specialmente financieramente pa e aerolineanan, pa aeropuerto y pa henter economia di Aruba. Tur esey sin conta pasaheronan cu ta sali mas laat, kisas cancelacion di vuelo, perdemento di vuelonan conexion na otro pais y asina por sigui menciona.

A move e avion na e parti zuid di e pista di Aeropuerto pa por a haci un investigacion mas riguroso riba dje. A haci uzo di Polis, di cachonan special pa busca bom y di Marina Real pa e trabounan por bay mas lihe cu normal. Di e forma aki pa evita cu e tardamento ta causa mas retraso den vuelonan na nos Aeropuerto. Polisnan a cera camindanan cu ta conduci na Aeropuerto durante cu tabata buscando pa e supuesto “bom” den e avion Airbus di Jet Blue.

Pa awor tur cos ta mustra cu un pasahro cu a yega abordo di e avion for di Merca ta esun cu a laga e mensahe ey atras cu e personal di limpiesa a topa cune den avion. Kico ta su intencion no ta conoci.