A retira Vocero di Ministerio Publico pa via di Facebook

Dia 20 di december Wladimir Alberto a fayece den un accidente di auto riba brug Juliana na Corsou. Despues di e accidente, vocero di Ministerio Publico (OM), Norman Serphos a comenta di un manera insolente di e hecho riba su account di Facebook priva. Mesun dia Serphos a duna di conoce cu no ta e a post e comentario. Supuestamente a “hack” su account y a bisa cu lo ta otronan a pone e comentario uzando su nomber.

Serphos a bay mas leu ainda, dor di haci un denuncia oficial na Polis di e hecho cu su account di Facebook ta gehack. Net prome cu aña caba a resulta cu ta Serphos mes a post e comentario riba e pagina di Facebook di Alberto. Ministerio Publico ta lamenta e manera cu cos nan a bay den e caso aki. No solamente pa e famianan di e defunto Alberto, pero tambe con comunidad a wordo afecta.

Ministerio Publico como dunado di trabou ta para tras di su trahadonan den caso cu nan derecho nan wordu trapa y na prome instante a kere cu esaki tabata e caso. Ministerio Publico ta exigi hopi di su trahadonan cu diariamente ta traha bou di presion y sa pasa cu tin biaha tin atake riba nan bida personal. Di otro banda ta exigi si cu e trahadonan ta integro, transparente y honesto. Lamentablemente den e caso aki, esaki no a sosode.

Awe Procurador General a prohibi Serphos entrada na e edificio y sistema nan di Ministerio Publico y a duna di conoce cu Ministerio Publico lo haci peticion di retiro inmediato na Minister di Hustisia y na Gobernador.

Den e proximo dianan lo finalisa e investigacion penal pa cu e conducta di Serphos. Ministerio Publico di Aruba lo haci esaki, pa evita cualkier tipo di conflicto di interes.

E famianan di defunto Alberto tambe a entrega un keho contra di Serphos. Entretanto Fiscal Mayor a tene un combersacion cu nan dia 28 di december 2018, na momento cu ainda no tabata conoci cu Serphos mes a pone e comentario riba Facebook. Riba termino corto lo atende cu e keho aki y lo comparti e resultadonan cu famianan.

For di awe Roderick Gouverneur lo fungi como vocero di Ministerio Publico.

Comments

comments