Manera ta conoci, na 2014 paspoort a bay di un tempo di valides di 5 aña pa 10 aña. Esey a trece cu ne cu, en realidad, bo mester a adapta e leges na calculacion di e halvering di e valides. Door di no a ahusta e leges ey, tabata sa cu lo wak cinco aña despues un caida den peticion pa renobacion, cu consecuencia di un deficit di entrada.
Segun hefe di Registro Civil y Censo, Sharin Luydens, mester a pas e ora ey e balor di e paspoort na e valides. Esey no a pasa e tempo aya, te cu for di 2019 a cuminsa sinti un caida. “E leges ta anticua. Si bo bay compara e legesnan di otro pais Caribense di reino den Caribe cu e leges na Hulanda, bo ta ripara cu e legesnan ta hopi mas caro pasobra nan si ta sigui adapta e leges na midi cu e producto su costo ta subi.”
E director a aclaria cu Censo no ta traha ganashi, pero si mester por cubri e gastonan di operacion. Dus esey ta trece cu ne cu ora bo ta calcula cuanto ta costa un papel di 5 florin, mane nos ta custuma yam’e, pero e papel ey no ta costa 5 florin; si bo wak cuanto gasto bo tin den bo operacion, ningun negoshi lo traha asina ey, cu bo producto ta costa 10 y bo ta bende 5. Si bo producto ta costa 10, e negoshi ta bende na 15 pasobra e 5 ta den ganashi y den produccion e ta 10.
Esey ta un ehercicio cu no ta pasa den gobierno, Luydens a indica y no ta cu Censo so, pero en general. Tin cu keda wak kico ta e costo di e producto pa pon’e claba den ley. E prijs di productonan suministra pa Registro Civil y Censo ta ancra den ley. Lo mester cada biaha cambia e ley. Pa evita esey, e ora ta miho pa bo haci un indexisering artikel in het algemeen, anto e ora ey manera bo producto su costo subi, e ta subi cu un index.
Door di no a tene cuenta cu e subida di e valides na 2014 pa cambia e balor, a nifica un perdida di entrada pa Pais Aruba. E ta un 42% en realidad, si bo calcula e entrada cu bo ta suppose di a gana di paspoort.
Por ultimo, Luydens a bisa cu ta bay wak un subida entre aworaki y 2023 cu 2024, door di e personanan cu nan paspoort ta bay caduca awo despues di 10 aña.
