Fiscal di Ministerio Publico a pidi y Hues Comisario a bay di acuerdo awe cu e demanda pa prolonga detencion di Reginald “Richi” Danies cu un maximo di 8 dia mas. E ta keda cera na Warda di Polis pendiente di e investigacion penal den su contra. Ta acus’e di menasa, un delito masha serio, aunke Ministerio Publico no a menciona ki tipo di menasa ni contra ken.
Diabierna ultimo dia 3 di juli, Polisnan a detene Richi Danies na final di e manifestacion dilanti edificio di Parlamento algo prome cu 11:00pm. Nan a dun’e te cu 10:00pm pa e por a manifesta liber di dje, cerando e caminda dilanti Parlamento. Pero ora cu Polis a yega despues di e ora, tabata parce cu e manifestantenan no kier a move y den e proceso a bay over na detencion di no menos cu 9 sospechoso.
Mester menciona cu e anochi ey Polisnan a bin pa detene mas tanto hende posibel, den cierto forma pa mustra nan poder y reestablece orden publico, aunke no tabatin ningun iregularidad na e sitio. Den e proceso por lo menos dos Polis individual a purba y a menasa di detene dos miembro di prensa den ehecucion di nan trabou di cubri un protesta. Polis a uza forsa bruto pa bay cu tur cu den cierto forma a stroba trabou di e Polisnan, sea dor di nenga di bandona e sitio of dor di keda sinta riba caminda. Su dia siguiente a laga 8 sospechoso den libertad atrobe, pero a wanta Danies cera pa menasa.
Abogado mr. Roland Dijkhoff tabatin piket como “abogado liber” den fin di siman y a bay mira Richi Danies, deteni na Warda di Polis pendiente e investigacion contra dje. E abogado a confirma awe cu a prolonga su detencion, aunke e mes no sa basa riba kico. El a bisa nos cu ainda e no a haya chens pa pasa den e documentonan penal contra su cliente, pero e ta convenci cu Fiscal a djis prolonga e detencion pa por keda cla cu algun interogacion mas pero cu lo laga Danies den libertad prome cu e 8 dianan transcuri.
