Diamars atardi alrededor di 4:40 pm un unidad di recherche a duna un auto marca Honda señal pa para den Pavia Country Club. Tin un ordo di detencion p’e chauffeur. Ta for di algun dia caba ta busc’e relaciona cu menasa.
E homber parce tin menos bon intencion cu su curpa tambe. E no ta un desconoci pa polis, ta algun siman pasa cu atende cu ne caba na su cas na San Barbola. E homber tin problema cu su pareha, parce a traha un cas completo pa e pareha pero e hende muhe no kier sa nada mas di dje. E no tin’e facil, e homber no kier acepta cu tur caba entre e y su pareha.
Despues cu a dun’e señal pa para, el a trot bay y cuminsa baha auto for di caminda purbando di huy pa e recherche. A sigui su tras pa basta rato. A sigui pa Rooi Afo y riba e caminda na altura di Morning Supermarket e perd’e fo’i bista. A activa tur e polisnan riba caya pa tira bista riba un Honda color blauw modelo CR-Z, numera A-50316.
Na altura di Print Media na Sero Blanco, un patruya di polis a top’e y a par’e mesora. E no por a haci mucho. E homber cu awa na wowo tabata pidi e agentenan pa tir’e mata. A detene mirando cu el a menasa varios persona. Un rato despues a transport’e pa ward’i polis caminda a present’e dilanti subfiscal. Na final a confisca e auto y a hib’e pa warda di polis pendiente investigacion.
