E tres Venezolanonan deteni for di october 2018 pa trece ilegal Aruba y durante cual dos a fayece, a presenta awe mainta dilanti mesa berde. E trio a keda morto spanta despues di scucha Fiscal exigi 10 aña di castigo pa cada un di nan.
Pa Fiscal no mester haci distincion entre e Capitan y e otro dosnan, pasobra tur tres tabatin un rol den loke cu a pasa dia 20 di october 2018. 
Ministerio Publico ta basa su mes riba declaracion di algun di e ilegalnan, informacion saca di chat y voicenote haya riba celular di un di e ilegalnan. Tur ta papia cu Juan Carlos Alvarez Colina tabata Capitan di e boto y esun cu a organisa e biahe. Den esaki el a haya ayudo di su ruman homber Angel Augusto Alvarez Colina, kende durante di e biahe tabata saca awa di e boto y su amigo Alvaro Luis Lopez Lugo, kende ta bisa cu el a yuda nan maneha e boto pasobra nan no tabata conoce e ruta mucho bon. Den e declaracionnan ta para cu Juan Carlos a haya 600 dollar, Alvaro Luis 200 dollar y Angel Augusto 100 dollar. 
STORIA A CAMBIA DEN CORTE
Den Corte e storia a cambia. Nan niun tabatin placa of a haya placa. Nan tur tabata doño di e boto. “Con bo kiermen?” Hues a puntra e supuesto Capitan Juan Carlos Alvarez Colina. “E diesdos hendenan cu a bini den e boto a pone placa hunto pa nos cumpra e boto y organisa un biah’e pa Aruba, pa trata di busca trabou. No a ni resta placa pa cumpra otro materialnan necesario manera radio di comunicacion, iluminacion of vest,” el a declara. E supuesto Capitan mes a declara den Corte cu nan tabata 12 persona abordo y no a obliga e hendenan pa bula na awa. E boto a pega den rif na mas o menos 20 meter for di costa y e hendenan mester a landa pa yega tera. “E no tabata leu,” el a bisa.
EXIGENCIA DI FISCAL
“Un biahe cu a wordo traha en busca di un miho bida a bay completamente robes y den un forma horibel”, asina Fiscal a bisa den su rekisitorio. A pone bida di e hendenan abordo na peligro door di haci e biahe aki sin ningun tipo di siguridad. No tabatin luz, nada di comunicacion y tampoco zwemvest, por si acaso algo bay malo. Y algo a bay malo, pasobra dilanti costa di Aruba dos di e personanan a hoga! Kende tabata e Capitan, no ta importa mas, pasobra “boso tur tres ta mes responsabel, tambe pa e dosnan cu a perde nan bida den e odisea aki,” Fiscal a bisa e acusadonan. E castigo maximo pa contrabanda di hende, si tin morto, ta 15 aña. Den e caso aki boso tur ta mes responsabel y esaki ta algo cu no por pasa nunca mas. Esaki mester keda refleha den e castigo tambe pa cual a pidi un castigo di 10 aña pa cada un.
Dia 28 di juni pa 8:15am lo tin sentencia den e caso aki. Mester menciona cu abogadonan mr. Peter Mohammed y mr. Dijkhoff a defende e tres acusadonan awe dilanti Corte.
