Diabierna atardi e Director nobo di Serlimar, Anko Koopmans a hay’e ta tuma medidanan drastico den un esfuerso pa salba e compania, cu a sufri di mal maneho pisa e ultimo dos añanan bou Minister Otmar Oduber y e ex-director Henley Davelaar di Corsou. Den dos aña di tempo e duo a sa di aumenta e gastonan di operacion di e compania di tal forma cu Gobierno a hay’e ta pusha miyones adicional pa por cumpli cu e debenan haci, sin cu a aumenta entradanan. Pero cu e situacion di Coronavirus, e situacion a empeora mas ainda!
Asina cu a bin cambio den Minister, a haci diferente esfuerso pa reduci gastonan innecesario den e compania cu de facto ta goza di un cierto monopolio den e industria di recogemento y procesamento di desperdicio riba nos isla. Asina a kibra contract cu un compania di siguridad, cu indirectamente ta pertenece na un miembro di Parlamento. A corta contract grandi cu agencia di publicidad y relacionnan publico yega na partido POR y sin lubida un lista largo di contractnan di propaganda pa “branding” cerca un cantidad di medionan di comunicacion y caranan conoci den comunidad cu tambe tabata yega na e partido politico. Tur e gastonan “royal” aki a hinca e compania den un buraco financiero cu ta dificil pa sali for di dje awo!
E carta “Serl/540/20” cu a manda diabierna atardi pa contratistanan ta referi na e hecho cu awor cu Gobierno a aplica “Shelter in Place” cu no ta posibel mas pa ta riba caya y sigui cu e trabounan di “Mantencion Bo Bario” cu e cantidad di contratistanan cu ta resorta bou di Serlimar. A pone un paro na tur trabou desde awe 29 di maart 2020 y te cu un proximo aviso. Na mes momento, debi na e situacion delicado di Serlimar, a informa mesora cu no por paga e contratistanan durante e periodo aki tampoco, pues lo aplica e maneho di “No work – No pay” cu Gobierno mes a anuncia na inicio di e crisis di Coronavirus.
Bisando esey, decenas di hende ta riba caya awo sin entrada debi cu cada contratista ta emplea 2, 3 te 5 hende pa haci e diferente trabounan pa Serlimar di mantencion di barionan limpi. Ta hendenan cu tin algun aña caba eherciendo e trabou aki.
Na final di e carta, e director nobo a sigura cu e decision aki sigur no ta nifica final di e acuerdo di trabou di forma definitivo, pero si temporalmente mientras cu e crisis di Coronavirus ta sigui y cu Gobierno ta implementa e status di “Shelter in Place”.
Loading…
Reload document 
Open in new tab 
