A ofrece un lift pero el a nenga: Motociclista fo’i tino na Coba Lodo

Riba caminda di Coba Lodo a sosode un incidente basta straño ora cu e habitantenan di e area a bati alarma na polis ora a scucha zonido fuerte den e area.

Na prome instante a pensa lo pio, cu lo tabata un accidente basta fuerte pero a bin topa cu algo completamente diferente. Un motociclista tabata tira riba caminda cu e brommer riba dje. Esaki a sosode den careda di 4:30 pm y mesora a pidi presencia di polis na e sitio.
A compronde cu e motociclista tabata fo’i tino y ta pa e motibo aki a pidi pa yega mas pronto posibel. Na yegada a bin hay’e lanta caba y cu intencion pa sigui core cual tabata un risico mirando locual a caba di pasa.

Polis a impedi esaki na comienso y a pidi presencia di un paramedico pa bin atende cu ne. E no tabata mustra herida pero no tabata consehabel pa e subi e brommer y core den su situacion, pesey a ofrec’e un lift y cu lo pidi un pickup pa transporta e brommer y e patruya mes lo dun’e un lift pa su cas.

Pa sopresa, e motociclista a nenga esaki. Na prome instante a acepta e lift pero ora cu e pickup a presenta el a hala atras. A nenga di laga e brommer bay den e pickup y a nenga di subi den patruya pa e lift. Aunke e tabata visibelmente ainda poco desorienta, e la dicidi riba su mes di subi su scooter y bandona sitio. Polis di su banda a haci nan best pero tambe a bandona sitio mirando cu e la nenga ayudo.