Recientemente Minister di Eseñansa, dr. Armando R. Lampe hunto cu Oficina di Scolnan Publico (DPS) a nombra un Management Team Interino pa Colegio San Nicolas pa e aña escolar 2020- 2021, cu ta consisti di Robin-Ann Didder BSc. y drs. Samuel E. Dumfries cu ta presidi e MT interino.
Juffrouw Didder ta un docente autorisa di fysica y kimica (NASK 1,2) y ta un analista kimico. E tin 24 aña di experiencia como docente. Tambe juffrouw Didder a sigui curso di Higher Management cu specialisa den Leadership, Management Financiero y strategico y HR. Tambe e tawata docente di DOC opleiding como Projectmanager y tawata parti di e Management Team di Serlimar Sui Generis funcionando como Opertions Manager.
Desde 2012 Robin-Ann Didder tawata director suplente di e dependance di Juliana school. Tambe el a funciona como miembro di rectorado di Colegio San Nicolas. E ultimo dos añanan juffrouw Didder tawata director suplente di Middag Mavo.
Samuel Dumfries tin un doctoraal den biologia y tambe ta un docente autorisa di biologia. Meneer Dumfries tin 20 aña di experiencia como docente local tambe international y a duna les na Colegio Arubano pa 10 aña largo y tawata sectievoorzitter di seccion di biologia.
Na Hulanda meneer Dumfries tawata director di Enseñansa di Arubahuis pa 4 aña. E tawata forma parti di e Management Team di Arubahuis y a publica diferente investigaciontocante di e porcentahe di studiante cu ta bolbe bek Aruba despues di nan estudio y e investigacion tocante di e
“ Switchgedrag” na unda nos studiantenan ta cambia pa un tal motibo di nan estudio den e prome aña di HBO-WO.
Samuel Dumfries tawata Senior Policy Advisor pa e ministerio di Medio Ambiente, Policy Advisor na DNM y e ultimo añanan a traha na Departamento di Enseñansa como Projectleader pa Educacion di Medio Ambiente, secretario di Stimulation Funds y e ta lidera e investigacion pa 4LO cu ta encera Studiantenan cu ta bay studia afor y con nan ta adapta n’e proceso ey.
Meneer Dumfries y juffrouw Didder ta hopi motiva pa tuma e reto aki y pa traha hunto cu e team di Colegio San Nicolas, Ministerio OWDO y DPS pa logra como MT Interino e metanan fiha pa enseñansa, pa asina yuda nos enseñansa caminda e mucha ta central.
