E siman aki Minister di Enseñansa, Dr. Rudy Lampe a anuncia cu a nombra Ryan Maduro como Director General di Colegio Profesional Intermedio “E.P.I”, un di e institucionnan educacional di mas importante di Aruba. Awendia hopi biaha ta dificil pa hobennan cu un diploma di MAVO of HAVO haya trabao, pero si nan tin un diploma di EPI, cu ta e unico scol na nivel MBO di Aruba, cu mesora e mercado laboral ta habri pa e graduado. A recluta Ryan Maduro via un proceso habri y transparente, cu un commission di reclutacion independiente for di Gobierno. Nan a dicidi unanimamente pa eligi Maduro na cabes di e scol, cu ta conta cu mas di 1300 alumno den diferente unidad y disciplina di enseñansa.
Ryan Maduro a crece den Colegio EPI, e conoce di paden y pafo. El a forma parti di e Management Team di Unidad di Hospitalidad y aworaki ta haya un encargo nobo y den su man ta pone e futuro di e instituto aki. Ta bon pa agrega cu recientemente Ryan Maduro a logra termina su estudio na nivel “Master Degree” den Educacion pa Adultonan. Esaki separa di tur su otro logronan y diplomanan den e ramo di enseñansa y liderazgo.
