A nombra Ruben Garcia como “The Godfather of Entertaiment”

660

Cu no menos di 48 aña di experencia den farandula, sea na radio, Maestro di Ceremonia, como promotor y ultimo decadanan hasta na television, Ruben “Scorpio” Garcia a ricibi un reconocimento special diasabra anochi como “The Godfather of Entertaiment designed by Buleria and Gentz”.

Anualmente, na ocasion di celebracion di cada aniversario di e banda Buleria, ta honra un persona cu a nifica algo den nan existencia y nan exito. E aña aki, durante e fiesta diasabra anochi cu Buleria y Gentz, a bolbe tene e ceremonia aki, dedica na un di e caranan mas conoci y respeta den promocion riba nos isla.


Ruben Garcia tabata eynan cu su famia pa ricibi e reconocimento special aki. El a keda masha contento cu a entrege e homenahe, cu sin duda lo haya un luga masha special den su hogar.

Ruben Garcia e aña aki a spanta tur hende, despues di a haya retonan serio di curason na Februari, despues di carnaval. El a bay Colombia pa tratamento medico avansa y specialisa. Na su yegada el a bisa di a cuminsa un bida nobo, mas trankil, menos agita y cu mas atencion na su salud. Ruben ta tur dia ainda na radio mainta, via Power 101.7 FM.