Conseho di Minister a aproba awe nombracion di Gino Winklaar como e Director nobo di Korrectie Instituut Aruba (KIA). Esaki despues cu nos a publica e noticia aki di algun siman pasa caba, den forma di primicia! Minister Andin Bikker a anuncia e decision aki mesora na e actual Altoinspector di Polis, sinta banda di Sergio Quant y dr. Verschuur, kendenan lo reenforsa Winklaar den su maneho diario den e centro coreccional.
Gino Winklaar a drenta Cuerpo Policial Aruba dia 1 di juli 2000 y mesora a bay studia na Hulanda pa e puesto di Inspector. Aki na Aruba bek el a traha den diferente funcion, entre otro como “Projectleider” y Hefe suplente den Recherche Samenwerkings Team (RST) pa 5 aña largo. Ey el a conduci varios caso y investigacionnan grandi, den cual a encera crimennan cu ta crusa frontera de Reino Hulandes y tin biaha hasta pa otro paisnan rond mundo. Desde dia 14 di mei 2018 e ta den funcion di “Districtchef” na San Nicolas, den cual su tarea ta pa mantene e operacion diario di henter e districto, incluyendo Polisnan uniforma, recherchenan, e personal administrativo y e departamentonan special cu ta traha for di e Warda di Polis di San Nicolas.
Minister Andin Bikker a bisa di ta convenci cu e preparacion di Gino Winklaar lo yuda so pa e por hiba e prizon na un siguiente nivel. Ta rekeri un inversion grandi pa por sea drecha e infrastructura of construi un prizon nobo, mirando cu esun aki ta riba 30 aña caba y tin hopi reto cune.
Na final e mandatario a gradici Sergio Quant, cu a fungi casi dos aña caba como Director Interino, despues cu Rocco Tjon a tuma su retiro pa e drenta arena politico y a bira Parlamentario. Ta bon pa menciona cu Quant tambe a solicita pa e funcion di Director di KIA hunto cu varios otro persona mas, pero Winklaar a resulta e miho candidato. Tambe ta asina cu e mesun Winklaar tambe a solicita pa e puesto di Altocomisario di Polis, cu ainda no tin un decision tuma.
