Despues di a yega na un acuerdo pa retira Humphrey Tromp di e puesto, ayera Aruba Ports Authority N.V. a anuncia na su trahadonan cu Edgar C. Croes a drenta servicio inmediato como “Financial Manager”. Edgar tabata te cu ayera, begrotingscoordinator di Minister di Finansa, mr. Xiomara Maduro. E tabata traha como Adjunct Accountant 1e klasse na Departamento di Impuesto di Aruba (DIMP).
Edgar Croes a studia na Erasmus University Rotterdam y despues na University of the Netherlands Antilles pa su Master’s Degree y Regester Accountant. E tin experiencia trahando como Assistant Accountant na KPMG Holdings N.V. na Hulanda, como Senior Accountant na Ernst & Young Aruba y despues como Adjunct Accountant 1e klasse na Departamento di Impuesto. Di eynan, cu cambio di gobernacion, el a bay asisti Minister di Finansa, Xiomara Maduro, como su coordinador di presupuesto.
Den su ultimo funcion e ta encarga pa prepara y traha presupuesto pa e ministerio mes y tur departamento cu ta resorta eybou. Tambe e ta asisti den controla y supervisa e presupuestonan di demas ministerionan. E ta miembro tambe di e “Belasting Hervormingsteam” di Gobierno di Aruba.
Den su funcion nobo, Edgar Croes lo supervisa e maneho financiero na Aruba Ports Authority N.V., precisamente den un tempo di hopi reto. Pa algun luna caba e compania ta pasando den temponan dificil, despues cu a stop cruceronan di nabega pa e area aki. E unico entrada di APA awor ta bini for di ASTEC cu ta maneha e waf di carga na Barcadera. Un fecha fiho pa cuminsa ricibi crucero na Aruba ainda no tin. Mientrastanto tin algun crucero staciona den waf na Playa, sin pasahero pero solamente tripulacion, wardando inicio di e temporada di cruceronan cuminsa atrobe.
