Conseho di Minister a bay di acuerdo cu proposicion di Minister di Husticia mr. Andin Bikker pa nombra ex-Altocomisario di Polis, Andrew Hoo, como representante special di Ministerio di Husticia den cuadro di acuerdonan di cooperacion cu Merca y e otro paisnan den Reino, riba tereno di husticia.
Tambe a nombra Andrew Hoo como specialista (“Kwartiermaker”) pa institui “Team Vitale Sectoren en Infrastructuur”, un proyecto piloto di cooperacion entre sector publico y priva pa cuido y proteccion di infrastructura y sector vital pa nos isla, manera por ehempel e area di refineria y su facilidadnan, cu ta den man di Refineria di Aruba bek desde februari 2020.
Acuerdonan di cooperacion
Tin varios acuerdo di cooperacion riba tereno di husticia cu ta rekeri atencion y dedicacion, por ehempel acuerdonan den cuadro di e Justitieel Vierpartijen Overleg (JVO), manera acuerdonan referente cooperacion di training y opleiding hudicial specialisa, un Memorandum of Understanding cu e Department of Justice di Merca y e Ministerionan di Husticia di Reino Hulandes y otro acuerdonan riba e tereno di husticia entre e paisnan, y acuerdonan referente aplicacion di innovacion specialisa pa organonan hudicial.
Corsou tambe tin un representante
Nos isla ruman Corsou a expresa intencion di apunta un persona cu amplio experiencia y dedica full time (“portefeuillehouder”) pa cu cooperacion di instancianan hudicial a base entre otro di e acuerdonan den cuadro di JVO. Minister Andin Bikker a haya necesario pa apunta un propio representante pa Aruba, mirando cu Aruba tin su propio status sui generis den Reino Hulandes, cu nos propio leynan hudicial. Ademas Minister Andin Bikker a dicidi pa amplia e scope dor di apunta Andrew Hoo como “Liaison officer” dedica pa cooperacion cu e Department of Justice di Merca y e Ministerionan di Husticia di Reino.
Andrew Hoo tin hopi experiencia
Andrew Hoo a participa na JVO desde aña 2018 y na 2019 el a sigui un curso extenso na Merca den cuadro di cooperacion y a mantene bon relacion cu departamentonan hudicial y consular di Merca. Na september 2019 el a compaña Minister Andin Bikker pa Washington D.C. caminda a bishita e Department of Justice y State Department den cuadro di cooperacion riba tereno di husticia. Sin duda e tin e experiencia y experticio pa duna mas contenido na e acuerdonan di cooperacion importante riba e tereno di husticia.
