Ta apenas diabierna marduga pa 1’or, ora di Aruba, cu a lansa e videoclip di Machika riba YouTube. Awe diasabra el a alcansa 20 miyon “view” caba, haciendo e un di e produccionnan cu a haya mas atencion riba su prome dia den historia musical. Pa Aruba, esaki ta un logro grandi, no solamente pasobra e ta menciona nomber di nos islanan na final, pero tambe pasobra e atencion di media internacional ta riba Jeon di Aruba!
Manera ta conoci, desde aña 2005 mundo conoce YouTube, un plataforma digital unda por download pelicula y musica, accesibel na 1.3 biyon hende na mundo henter. Cada minuut ta download 300 ora di video riba e plataforma aki. Tur dia ta mira un averahe di 5 biyon video riba YouTube. Den un luna averahe, 8 di cada 10 hende den edad entre 18 pa 49 aña, ta mira YouTube.
Historia musical di Aruba riba e plataforma aki, probablemente ta keda na Jonathan Thiel mes, conoci awo pa mundo como Jeon. E record di cancion di Aruba riba YouTube ta di dje mes, cu e cancion “Dushi Bida” cu el a publica 1 aña pasa riba YouTube y cu a mire no menos di 2.3 miyon biaha. Ningun otro produccion musical di Aruba a yega di conoce un exito dje grandi aki.
Un di e cancionnan cu a bende mas CD na Aruba por ehempel ta Claudius Phillips cu “Saca e Boom Boom”, pero cu riba YouTube nan a mire solamente 161 mil biaha. Inside the Thing, exito di carnaval di N’ Fusion a mire 175 mil biaha, Jump with your Towel di Quasi a mire 170 mil biaha mientras cu I can’t wait di Le Groove a mira 106 mil biaha.
Aunke cu pa nos, e cifranan den miyones ta nobo, specialmente pasobra ta apenas 100 mil hende ta biba riba e pida baranca aki, pa e cantantenan grandi manera J Balvin, e ta normal. Su cancion mas popular ta “Mi gente” cu el a lansa 6 luna pasa pero cu ya caba a mir’e no menos di 1.5 biyon biaha. No tin mucho artista cu conoce tanto exito manera esun aki.
Claro cu despues di e prome dianan, e popularidad di e cancion ta bay bahando, pero si e mantene su mes algun dia mas cu 20 miyon “view” pa dia, anto sin duda e lo por alcansa recordnan halto den cantidad di biaha cu usuarionan di YouTube ta mira e cancion aki. Ta premira cu e cancion “Machika” di Aruba ta un di e candidatonan fuerte pa bira e cancion oficial di e weganan mundial di futbol FIFA, cu ta tuma luga entre 14 di juni pa 15 di juli 2018 na Rusia.
E ultimo añanan, Shakira a domina hopi den e campeonatonan mundial di futbol, manera na 2006 cu “Hips don’t lie”, sigui na 2010 cu “Waka Waka”. Na 2014 tabata Ricky Martin, Wisin y J-Lo cu e cancion Adrenalina na Spaño of “All Night” di Icona Pop na Ingles.
