A manda Ruben Goedhoop cas pero servicio ta sigui

2376

Minister Dangui Oduber, como e minister encarga cu AZV, a confirma cu diabierna atardi a suspende CEO di AZV, Ruben Goedhoop, di su funcion. E proceso aki a cana segun ley y ta un decision tuma hunto cu e Hunto di Supervision di AZV. Na e momentonan aki minister no lo bay den detaye di e motibonan, solamente cu e director a tuma cierto decisionnan cu a conduci na su suspension. No por divulga ningun detaye mas pa no stroba e proceso cu ta andando.

Di otro banda, AZV mes den un relato tambe a confirma suspension di nan director, pero a sigura si cu nan servicio ta sigui. Diabierna 16 di october ultimo, e Hunta di Comisario di AZV a suspende director Ruben Goedhoop. Na mes momento tambe e Hunta di Comisario y AZV ta haya necesario pa no bay den detaye tocante e suspension. Esaki ta di un banda na e bienestar di Ruben Goedhoop y di e otro banda na bienestar di AZV mes.

AZV ta garantisa na tur su aseguradonan y dunadonan di cuido cu e decision aki no ta afecta e servicionan di AZV. Cada un por keda conta riba e servicionan online manera cu AZV a bin ta duna e ultimo simannan pa medio di email pa cliente esta [email protected] of [email protected] Tambe por yama na 5279900 of check informacion riba e pagina di Facebook of Instagram.