Desde cu Katiuska Alvarez a fayece recientemente aki na Aruba, amigonan a bin ta organisa diferente evento pa recauda fondo y duna nan amiga y ser keri un entiero digno.
Un di e amiganan cu ta forma parti di e grupo di amistad aki ta Luisa Peterson. Nan ta manda palabra di gradicimento na tur esnan cu a mustra un gesto di solidaridad ya cu nan por bisa cu a logra nan meta. A logra recauda suficiente fondo pa realisa e acto di cremacion y paga pasashi di e mama y un tanta pa ta presente durante e ceremonia di entiero.
Mientrastanto a logra paga tur gasto envolvi for di diaranson ultimo caba. Y a logra haya un permiso special pa permiti entrada di e dos familiarnan di Katiuska pa ta presente durante e ceremonia di entiero. A logra esaki cu e visa humanitario, y pago di tur e gastonan di e familiarnan durante un siman na Aruba, incluso nan seguro.
Nan ta gradici no solamente e comunidad Latino, pero tambe e Arubianonan cu a duna nan cooperacion durante e un siman cu e evento aki a tuma luga. Y ta recorda cu nan no ta recaudando fondo mas pa Katiuska, pasobra tur gasto ta cubri caba.
Ta informa cu e mama y e tanta ta yega diasabra, mientras cu e acto di cremacion ta tuma luga diamars otro siman. E velorio lo ta e mesun dia na Olive Tree, y ta recorda pa tene cuenta cu e reglanan di DVG. “Katiuska tabata stima e isla y feliz aki. Lamentablemente cosnan a bay otro.”
