Diamars a tuma luga lansamento di un proyecto cu Fundacion Anti Droga Aruba (FADA) ta bezig cun’e desde 2016 y sigur tur fin di aña desde e tempo ey ta lansa hopi special, pa loke ta e campaña di Amigo DiDi.
Rulienne Arends, trahado preventivo di FADA, a splica cu Amigo DiDi, tin temporada fiho cu ta enfoca hopi riba dje, unda cu ta temporadanan cu e parti di consumo di alcohol ta hopi mas visibel compara cu otro temporadanan di aña. P’esey e aña aki tin un video hopi special cu kier a lansa, unda cu ta bay un tiki mas riba e realidad cu por sosode na momento cu tin actividadnan di fin di aña.
Tambe tin di bisa cu a uni forsa cu Fundacion Zinnia y Cuerpo Policial pa loke ta e campaña di Amigo Didi.
Cifra
Vocero policial Lito Lacle, a trece algun cifra pa loke ta 2019. Tin te awor aki 8 morto den trafico di cual 2 ta accidente di motorcycle. No por relaciona e accidentenan aki cu consumo di alcohol, pero si loke por traha ta e parti preventivo. E video ta uno impactante. Segun Lacle, Cuerpo Policial cu mil amor ta traha hunto cu e diferente stakeholdernan pa por yega na un producto cu pa dianan di fiesta y carnaval cu ta bay bin, cu menos hende ta realisa cu nan tin cu uza alcohol y stuur.
Fundacion Zinnia
Fundacion Zinnia a lanta cu e meta pa conscientisa ciudadanonan riba coremento bao di influencia di alcohol. Segun Sue Ann Ras, sigur esaki ta keda un problema grandi den sociedad y socialmente, ora papia di temporada di fin di aña y demas temporada di fiesta.
Ta p’esey mes kier hiba e mensahe dilanti. Hopi biaha nos no ta tene cuenta cu esnan cu ta keda atras. Esaki ta keda un problema hopi grandi, specialmente pa e famia di e victima. Mester ta un tiki mas consciente ora nos ta bebe y si nos dicidi di coy e auto y core. Ras ta hopi contento di mira cu ta bolbe lansa un video hunto cu FADA pa Amigo DiDi p’asina sigui conscientisa y traha mas riba e parti preventivo y no curativo manera cu e ta actualmente.
Reaccion di comunidad
For di experiencia di carnaval, e campaña di Amigo DiDi tabata sumamente exitoso. Hopi biaha ta scucha hende bisa cu nan ta DiDi. El a cuminsa haya un nificacion den comunidad, aunke cu falta hopi mas. Ainda ta haya e hendenan cu ta keda inconscientemente coy e yabi siendo cu a consumi alcohol. Ta yama inconscientemente, pasobra nan no tin dominio mas ora cu nan ta bebi. Pero conscientemente mester ta prome cu esey caba. Prome cu bo bay bebe mester tin un hende disponibel cu lo ta haci’e. Kiermen, segun Ras, poco poco e ta hayando su reaccion cu e mester haya. Esey no ta nifica cu mester stop tampoco.
Campaña di conscientisacion mester keda y mustra di berdad kico ta pasando. Hopi biaha nos kier wak cu ya e persona a muri y nos ta lubida riba kico a pasa. Pero e ta hopi importante pa keda trece esaki dilanti pa hendenan por sa realmente kico a pasa. Esey ta un di e metanan di Fundacion Zinia. Ta p’esey ta keda traha den e temporadanan halto. Ta keda bin cu tipo di campañanan aki pa wak si por cende un luz pa esnan cu tin mester.
