CMC a realisá e promé kaso di iradiashon di sanger ku e aparato nobo di LINAC. E meta di iradiashon ta pa eliminá “lymphocyte T”, kual ta un auto-defensa di sanger ora ku e sanger detektá agentenan eksterno. Iradiashon ta yuda e sistema di e pashènt aseptá sanger nobo (den proseso di transfushon) ku menos komplikashon i menos chèns pa rechasá esaki.
Ora transferí sanger na pashèntnan ku tin defisiensia den nan sistema imunologiko (p.e. un pashènt di kanser òf un pashènt ku mester operá pa transplantashon di órgano), mester iradiá e sanger ku un dosis abou di radiashon pa frena e proliferashon di T-Lypmhocyte. Sin e proseso aki, e “lymphocytes” lo por tuma e sistema immunológiko over i ataká organonan salú, lokual por tin un efekto negativo riba e pashènt. E tratamentu di sanger aki por wòrdu konsiderá komo un manera mas sigur pa por prevení komplikashon.
CMC por apliká e proseso di iradiashon riba dos saku di sanger pareu ku e aparto di LINAC (mira imahen). E aparato di LINAC en general ta wòrdu usá pa tratamentu di kanser. Apesar di e sirkunstansianan di COVID-19, CMC ta sigui inová pa por duna mihó kalidat di servisio na nos pashèntnan.
