A kita tres dia di vakantie di empleadonan di WNC

Relaciona cu e desaroyonan di e ultimo simannan na Warda Nos Costa, Sindicato di Empleado Publico y Priva di Aruba (SEPPA) a pidi y haya un reunion, cu caracter di urgencia, cu e Minister di Husticia Andin Bikker.

E delegacion tabata encabesa pa Edmundo Marlin, vice Secretario General di SEPPA, kende a bisa, cu a trata temanan di preocupacion di e empleadonan. Un di nan ta cu a corta cantidad di dianan di vakantie di e empleadonan di WNC, tres dia menos.

A kita tres dia di vakantie di empleadonan di WNC

A kita tres dia di vakantie di empleadonan di WNC. Click link pa mas https://24ora.tv/2XqnXnr

Posted by 24ora on Monday, November 18, 2019

A pidi e Minister pa atende e asunto aki mas lihe posibel, ya cu ta un tema cu nan a bin ta atende cu e cosnan aki for di augustus ultimo. Pa SEPPA no ta importante kende a bini cu e cambio pero si pa haya loke cu ta coresponde na nan. Ademas, a mustra e mandatario cu esnan cu ta traha den dia tin cierto cantidad di dianan di vakantie basa riba e schaal den cual e ta cay. Esnan cu ta traha anochi of warda tin tres dia di vakantie adicional y esaki ta loke a kita di e miembronan di SEPPA na WNC.  SEPPA ta exigi pa coregi esaki den 2019 pa ora cu nan yega 2002 tur hende sa nan cantidad di dianan di vakantie.

E mandatario a priminti cu e siman aki mester tin un decision riba e tema di vakantiedagen.

Shopsteward

Den combersacion cu Melvin Ras, shopsteward di SEPPA na WNC, el a splica cu e tin di haber cu tur e problemanan cu tin na e departamentonan aki cu tin e trahadonan disgusta. “Nos kier yega na un acuerdo cu e Minister di Husticia pa por tin trankilidad na WNC,” e delegado a bisa.

Specialmente esnan di WNC trahando na e sede na Dakota, ta sinti cu ta laga nan na caya. Asina hopi biaha ta yama reunion of tin oportunidad pa sigui curso, pero esnan trahando na Huis van Bewaring na Dakota tabata keda afo of no ta haya informacion mes.

El a recorda cu den e reunion anterior, e mandatario a duna un palabracion cu ta bay “tira awa den biña” pa un miho futuro pa Warda Nos Costa y e mes ta kere cu semper na mesa por yega na un areglo.

Mudamento

Siman pasa tambe nan a haya un carta den cual ta informa personal cu tur esnan deteni na HvB ta bay pa e warda banda di aeropuerto, pa di e manera aki cuminsa cu e plannan di drecha e luga aki. Y cu e sede aki ta bira un sitio di detencion temporal.

WNC tin un total di 40 empleado, reparti riba e dos sedenan.