A kibra drenta den oficina di Migracion riba Vondellaan

Awe tardi a descubri un caso di ladronicia na oficina principal di Migracion Aruba, situa den Alfred de Mussetstraat, un caya cu ta core paralelo cu Vondellaan. Na e sitio a topa cu bentana forsa. Parce cu e ladronnan a haci un desaster paden. 

No ta conoci si a horta material of articulonan cu ta pertenece na e departamento resortando bou di Ministerio di Husticia. Empleadonan a revisa e oficina pero mester warda ora tur colega ta na oficina pa verifica si lo por falta algo.

Polisnan Forensico a presenta mesora pa investiga con ladronnan a logra penetra den e edificio, for di unda a drenta y si nan por a laga rastro atras na bentana of na e lessenaarnan paden. 

Na e oficina aki ta yega varios stranhero regularmente pa pidi pa alarga nan estadia na Aruba. E servicio aki, cu antes tabata bou emcargo di DIMAS, a pasa di algun tempo caba pa Migracion. Nan ta conecta riba e sistema di Migracion y como tal tin acceso na informacion di yegada di pasaheronan, pa por alarga nan estadia den e sistema Radex.