A keda demostra cu Dionne Christy Leito su consenshi ta limpi

2078

For di aña 2016 Dionne Christy Leito, un enfermera trahando na Instituto Coreccional Aruba (KIA), a bin ta luchando pa demostra su inocencia. Na final di aña Corte a tuma un decision cu a proba cu Dionne Christy Leito su consenshi ta limpi.

Na aña 2016 despues di un investigacion, autoridadnan a dicidi di detene Leito y su prome prolongacion a tuma luga dia 11 di october, 2016. Pero dado momento Hues Comisario a dicidi di lague bay liber pa motibo cu “por deduci a base di documentonan presenta cu no tin suficiente obhecionnan pisa y base contra e sospechoso di un delito penal, manera describi door di Fiscal”. A base di esaki a lague liber.

Apesar di esaki a dicidi di dun’e su retiro  via di un decreto Gubernamental dia 14 di mei,  2018 como castigo disciplinario. Inmediatamente Leito a bay contra e decision aki, poniendo un obheccion na Corte. Tratamento di e caso mes a tuma luga door di Corte di Casonan di Ambtenaar dia 3 di december, 2018.

A cuminsa, e obheccionnan di e castigo disciplinario aki Hues a declara inadmisibel. Analisando esaki a base di e cuadro legal, Hues ta bisa cu un ambtenaar por wordo retira a base di ta incapaz of inadecuado pa un trabou. Pero tambe pa no cumpli cu su tarea, manera ta describi den su reglanan di trabou.

Den e decreto entrega na Leito ta menciona cu el a haci su mes culpabel na “ernstig plichtsverzuim” (fayo serio den cumpli cu su tarea). Esaki ta encera cu e ta wordo sospecha cu el a ricibi droga y 500 florin na su cas y cu el a pasa esaki na KIA pa entregue na un detenido; cu OM ta bisa esaki a sosode dos biaha caba y cu a detene dia 3 di october, 2016.

Pero e funcionario a defende su mes bisando cu aki ta trata di un sospecho cu autoridadnan ta bisa cu nan tin. Nunca a hay’e cu droga y no tin prueba cu ela hinca droga den KIA. Pero cu tampoco tin un caso penal pendiente contra dje.

Den casonan asina e doño di trabou (Gobierno of Pais Aruba) mester prueba cu el a faya den cumpli cu su tareanan. Y e decision cu e Hues den caso di ambtenaarnan ta los di cualkier proceso penal cu lo por tin andando. No a entrega e dossier penal y no a cita Leito. Den e caso aki no ta discusion cu e yiu muhe di Leito a ricibi un pakete cu a yega na su cas. No sa contenido di e pakete. El a bisa cu regularmente e ta cumpra calco cu nan ta trece p’e. No a proba cu el a hiba e pakete aki den KIA.  Pues no tin suficiente prueba cu el a viola di cumpli cu su tareanan y no a comete e violacionnan cu ta para den e decreto a base di cual a dun’e su retiro.

Mientrastanto na juli, 2019, el a haya un carta di Ministerio Publico unda ta informa cu lo no persigui’e penalmente pa violacion di ley di droga pasobra no tin pruebanan legal pa esaki. Na september a bini un decision di Corte tambe cu mester pague su salario te ora cu tin un decision definitivo den su caso.