A keha Clarissa Arrindell pa estafa

Awe mainta un grupo di ciudadano, considera como victima di estafa y ladronicia, a presenta na Warda di Polis di San Nicolas pa ey entrega keho na recherche contra e conocido Clarissa Arrindell, actual Señora Carnaval. Ta acus’e di estafa di rond di 70 mil florin (US$ 40.000,=), cu e lo a tuma di ciudadanonan cu a confi’e cu nan carchinan pa bay mira e concierto di Marco Antonio Solis. El a haci’e estilo di paga “poco poco” pero na final no a entrega e carchinan na tur cu a pag’e.

E promotor di e evento, Steve Hudson, a confirma cu berdad el a hay’e cu decenas di hende na su oficina demandando pa e carchi cu nan a paga. El a splica nan cu for di luna di juni Clarissa Arrindell a reserva 14 mesa di concierto cerca dje, den seccion VIP. El a haci mesun cos pa Ana Gabriel y como cu el a bay bon, a confi’e cu e mesun “deal” pa Marco Antonio Solis. Obviamente e biaha aki si e cos a bay completamente robes, cu consecuencia cu decenas di persona a resulta victima di un estafa sin prescedente.

Decenas di victima a keha Señora Carnaval pa estafa

Decenas di victima a keha Señora Carnaval pa estafa. Click e link pa mas https://24ora.news/2X5fwhp

Posted by 24ora on Monday, November 11, 2019

Tur hende a cuminsa ansha ora e dianan tabata cercando y cada cumprado a haya un otro storia di tende, sea cu nan a atrak’e, of belasting a pone beslag riba su cuenta of tambe cu el a duna un señora na Paradera e placa pa want’e den un kluis pero cu e no por localisa e señora awo. Cu e realidad ey riba mesa y cu e concierto tumando luga diadomingo ultimo, e cumpradonan di mesa VIP a cuminsa demanda pa nan carchinan, tanto na oficina di e promotor di Marco Antonio Solis como tambe riba Facebook ora cu no a logra localisa Clarissa di ningun forma.

Algun mil persona a acudi ayera nochi na e concierto di Marco Antonio Solis “El Mas Querido” cu a presenta hunto cu su dos yiunan na Aruba Harbour Arena. Publico presente a biba cu cada un di su cancionnan, a goza di e bon servicio di bar y cushina di Renaissance Resort, luz y zonido di Elite Productions y e organisacion general cu tabata den man di Showbizz International di e promotor Steve Hudson.

Polis a conseha tur cu a entrega keho awe pa no duna entrevista na prensa pasobra esey por “zwak” nan caso dilanti Hues. Asina mes varios di nan a informa cu nan ta sinti nan mes hopi defrauda den Clarissa Arrindell debi cu nan conoce, a confi’e y awo ta haya nan mes cu un problema sin spera. Mayoria di e victimanan a paga Clarissa como 700 florin pa nan stoel den e concierto, cu a inclui entrada y stoel cerca di e escenario y hasta algun bebida riba mesa.

Awe mainta a nota Clarissa Arrindell yegando cu su mama Island Finance. Fuentenan cerca di dje a bisa cu su famia a sali sostene y tur ta purbando awo pa haci un fiansa na banco of na Island Finance pa cera e 70 mil florin pa paga e mas o menos 120 personanan cu a pag’e pa ta na un di e 12 mesanan cu na final el a keda di paga e promotor.

Aña pasa a eligi Clarissa Arrindell como Señora Carnaval, pero banda di esey e ta masha popular riba nos isla for di tempo cu e tabata anuncia number di Sorteo di Diario na television y ta e Relacionista Publico di e grupo di carnaval “Empire Carnival Group”.

Hecho ta cu na oficina di e concierto di Marco Antonio Solis na Aruba mes tambe a ofrece e mesun posibilidad aki, esta pa paga pocopoco prome cu e evento, contal cu riba dia di e concierto e mester ta completamente paga. Con toch tanto hende a bay confia un “tercera persona” cu nan placa ta keda un pregunta. E victimanan a bisa nos cu nan conoce personalmente y nunca a imagina cu lo yega e dia cu mester keh’e na Polis pa malversacion di nan placa.