Ta poco compania ta inverti durante un pandemia, specialmente ora cu e negoshi ta cera y sin ningun entrada. Ta solamente inversionistanan cu ta kere den Aruba, lo tin e curashi di pone schouder bou di recuperacion di nos economia. Awe Alex Nieuwmeijer a invita Minister Dangui Oduber pa bishita Divi Tamarijn pa aprecia e renobacion cu a caba di haci.
Divi Tamarijn a planea pa cuminsa renobacion di tur e cambernan den diferente fase e aña aki. A pronistica cu e trabounan lo a dura 3 aña largo. Ta for di basta tempo caba a prepara e plan di renobacion di mayoria di su cambernan. Cada pasa algun aña ta renoba e cambernan atrobe, den un esfuerso pa mantene calidad di e hotel na halto.
Despues cu e hotel a cera na maart 2020 debi na e pandemia, esaki no a cambia nan pensamento pa inverti. Loke si a cambia ta e fasenan. Divi a dicidi di haci henter e inversion e aña aki y e trabounan a dura 6 luna.
Un tremendo inversion, e cambernan a keda hopi luhuso, espacioso y moderno. Divi Group ta keda demostra nan compromiso den nos pais, door di haci un inversion di mas di 10 miyon florin pa renoba 216 camber.
“Na mes momento nos como gobierno a reconoce Alex Nieuwmeijer pa tur loke e ta haci pa Aruba. Specialmente pa su pasion, su compromiso y su amor pa Aruba y nos industria turistico. Bo ta un ciudadano di Aruba di curason”, asina Minister Dangui Oduber a termina bisando.
