Departamento di Mucha y Hoben (DMH) ta informa cu dia 7 di juni 2021 e proyecto piloto di intervencion trempan pa nos muchanan cu necesidad special den centro di cuido di mucha a inicia cu e prome etapa. Aki a conta cu presencia di dos profesional di University of Missouri – Kansas City Institute for Human Development (UMKC-IHD), esta dr. Kelly Hantak, y dr. Michael Abel, pa yuda Aruba crea y implementa un sistema efectivo, hunto cu tur e instancianan cu nos ta considera como uno importante den e proyecto aki.
Anouk Eman, lider di e proyecto piloto aki, a ricibi e tarea specifico aki como parti di Social Crisis Plan (SCP). DMH tabata encarga cu ehecucion di e Ley di Centro di Cuido di Mucha bou maneho di coordinador nacional, Sue-Ann Ras, cu e meta pa crea suficiente conocemento den e centronan di cuido di mucha pa por tin deteccion y intervencion trempan pa nos muchanan cu e necesidadnan special. E desaroyo di un sistema intervencion trempan lo sosode den varios etapa.
Etapa 1 di e proyecto piloto a cuminsa dialuna y lo tin un duracion di 5 dia, unda cu dr. Hantak y dr. Abel lo presenta mas bien e parti di “technical support”. Esaki ta pa crea un sistema structural di intervencion trempan y hunto cu tur e instancianan concerni p’asina desaroya maneho riba un nivel nacional, protocol y e proceduranan con pa identifica nos muchanan cu necesidad special pa duna guia y brinda sosten na tanto e centronan di cuido di mucha y como tambe e mayornan.
Etapa 2 di e proyecto piloto lo tuma luga den e luna di september 2021. Dr. Hantak lo regresa Aruba pa train e profesionalnan hands-on ariba e area di “early screenings”, unda cu lo haci e screening ariba un grupo di meta di 30 mucha cu ta atendiendo centronan di cuido di mucha na Aruba. Nan lo percura pa entrega un carta di autorisacion pa ambos mayor y e centronan di cuido cu ta desea di participa den e proyecto piloto aki. Ta importante pa menciona cu sin data, Aruba no por ricibi sosten financiero di fondonan internacional. Mirando cu e demanda ta uno hopi halto di ambos e mayor- y cabesantenan, e meta ta pa haya mas fondo posibel p’e proyecto piloto aki ta uno exitoso pa por brinda tur mucha un oportunidad igual. Asina nan por atende un scol regular y ta un miembro independiente di comunidad di Aruba. “Mi kier a duna un danki na MR. Freddy Zedan (Director of Hotel Operations) y Mr. Marin Bijl (General Manager) di Divi hotel pa brinda nos e espacio pa e reunionnan interactivo cu ta dura te cu diabierna awor”.
