Dos nomber grandi di Aruba a zona diasabra anochi den un celebracion memey di caya grandi. Edgar Connor, pionero di musica di steel pan na Aruba, y Charlie’s Bar, e nomber mas conoci den caya grandi na San Nicolas.
Dia 18 di januari Connor, si e tabata na bida, lo a celebra su 81 aniversario (fayece na 1996) y Charlie’s Bar a recorda cu 79 aña pasa a cuminsa atende clientenan den centro di San Nicolas. E tradicion di musica di steel pan a sigui na man di e yiunan Nico y Lee Connor promoviendo e musica aki na Aruba.
Pa sigui rindi honor na e pionero aki, a tene un celebracion den centro di San Nicolas, net dilanti di Charlie’s Bar, cu tambe ta den celebracion cu nan 79 aña di existencia.
Apesar di e yobida, e amantenan di musica a sigui den ambiente, bailando riba e musica, unda tambe tabatin presentacion di “Invaders”. E anochi a habri cu un show y presentacion di studiantenan di Aruba Pan Man Foundation, tanto mucha como adulto, pero tambe show di trahenan di carnaval di Cocorico in Motion.
Memey di show a toca “happy birthday” riba steel pan y cu repartimento di bolo. Diferente miembro di famia Connor tabata presente na e celebracion aki.
