A base di proposicion di Minister Andin Bikker, Conseho di Minister a aproba aumento den e balor di “bon” nan pa cuminda pa departamentonan di husticia ora traha overtime. E areglo nobo ta conta specificamente pa Cuerpo Policial, Korrektie Instituut Aruba (KIA), Dienst Brandweer, Dienst Douane, Cuerpo Especial Arubano (CEA) y Migracion Aruba (IASA, GNC).
E “maaltijdbonnen” no a conoce un ahuste den practica desde aña 1993 y ya e balor di e bon nan no ta yega pa por cumpra un cuminda nutritivo. E decision di Conseho di Minister ta encera basicamente cu categoria A (actualmente Afl. 7,50) lo bira pa Afl. 15,- y cu Categoria B (actualmente Afl. 12,50) lo bira Afl. 18,75.
E decision positivo di ministerraad lo haya implementacion a corto plaso. Minister Bikker ta reconoce e esfuerso di diferente sindicato, entre nan Sindicato di Polis SPA, cu a keda recorda constantemente riba e tema.
