No a tende mucho ultimo dianan pero cu ilegalnan ta sigui yega Aruba, ta un realidad. Esaki ta keda proba pa e pruebanan cu nan ta laga atras.

Personanan cu den fin di siman a cana of pasa den bisindario di costa nort di Aruba a topa cu diferente material cu ta indica cu tin personanan cu mester a drenta Aruba di un forma no comun. Segun e persona cu a contact 24ora.com, diadomingo nan a bay surf panort di Aruba na Boca Keto (entre Daimari cu Conchi) den oranan di 6:30am pa 10:30am.

Na caminda bek pa cas a bin topa cu rond di 5 lifevest tira canto di costa na e barancanan. “E unico cos nos por asumi ta cu hendenan a drenta nos costanan y a tira esakinan na banda ora nan a yega,” un di nan a comenta na nos.
Normal ta cu tur lifevest mester tin riba dje nomber di e nave y e number di registracion. Esaki ta un forma pa “trace back” ora cu tin un naufragio. Pero manera cu por spera den tipo di casonan asina, no tin ningun dato riba e lifevestnan haya panort di Aruba.

Pero tambe a constata cu e lifevestnan aki no ta cos di hopi dia tira na costa pasobra ainda solo no a kima nan. Pues probablemente den fin di siman boto a yega Aruba. E hecho cu tin lifevest ta algo nobo tambe, pasobra normalmente, e hendenan cu ta drenta ilegal ta wordo tira den lama mas cerca posibel di costa y nan mester mira con pa yega canto. Probablemente e hendenan mes a cuminsa demanda cu mester tin lifevest inclui den e pago cu nan ta haci.

Comments

comments