Diasabra atrobe Serlimar, bou guia di nan hefe, esta Robin-Ann Didder di e Management Team nobo, a sali pa bishita algun adres specifico unda tin hende cu bari di sushi y cu no ta pagando of debe e compania. Durante e recorido, a yega na Ierlandstraat # 11, na cas di Parlamentario di MEP, Daphne Lejuez y a topa cu dos di e barinan aki. No ta conoci si e ta uza nan na cas of pa su negoshi Carib Media.
Hecho ta cu a duna ordo pa bay cu e dos barinan mesora for di e sitio. Mientras cu e empleadonan di Serlimar tabata cargando e bakinan di sushi pa hinca den pickup, e Parlamentario a bin afo cu un actitud di disgusto. E no a aprecia cu a yega su cas den grupo grandi y filmando henter e operacion.
Probablemente e Fraccion di MEP no lo a spera cu e accion di Serlimar, bou auspicio di politiconan di e partido di coalicion POR, lo yega na nan porta di cas asina lihe.
Paramentario Lejuez a vocifera eyfo cu ta e mes a yama Serlimar pa bin busca nan barinan di sushi pasobra e no ta uza nan. A mira si cu e tabatin bakinan di EcoTech na su cas/oficina, pues el a bisa cu ta Serlimar a laga e bakinan algun luna pasa caba pero cu nan no ta uzanan.
Sinembargo, ora cu e empleadonan a bay carga e barinan pa hinca den pickup, a constata cu e barinan tabata yen-yen di sushi, pues cu nan tabata uza e barinan si. Obviamente e doño di cas y Serlimar aki no ta riba e mesun liña pasobra Bo no kier paga pasobra Bo tin otro compania pero ta yena e barinan di Serlimar si.
Daphne Lejuez, tabata Presidente di Camara di Comercio, pero a subi lista di MEP na aña 2017 y a participa den eleccion na September. El a logra 196 voto riba su nomber. Y ta e Parlamentario awor cu menos voto den e Fraccion di MEP.
