A gara trahadornan bendiendo turista island tour y droga simultaneamente

Personal di Strand Politie durante control a gara bendedornan di droga na Palm Beach. Aki ta trata di hendenan cu ta traha pa un compania cu ta bende island tour cu UTV. A drenta un tip na Polis cu tin algun persona bendiendo droga na turista.

A hasta duna informacion unda precies ta ofreciendo e droga den zona turisico. Personal di Strand Politie a yega y cuminsa investigacion a base di e tip cu a drenta. Parce cu publicamente ta ofrece droga na e turistanan. Durante un investigacion a bin topa cu cierto cantidad di Marihuana na prome instante. Un cantidad pa benta. E tabata scondi den un of mas di e vehiculonan di offroad.

E momento ey ningun di e personanan presente kier a admiti. Despues un di nan a laga sa cu e droga ta di dje. A bay over na detencion di cuater finalmente y a haya ademas di marihuana un cantidad di cocaina. A confisca tambe arma blanco cu tabata scondi den e vehiculonan. Tabata intencion pa tuma vehiculonan den beslag. Esaki finalmente no a sosode.

E compania ta expone su vehiculonan di offroad den e zona. Ta pone UTV y Quad Racers. Anochi ora ta druk ta laga cierto hende bende tour riba e ruta turistico. E trahadornan a opta pa bende ademas di island tour droga na e turistanan. Tin turista ta bin Aruba y ta busca droga pa cumpra.

Asina mes tin hopi turista cu ta bin Aruba pero kier disfruta sanamente. Remarcable ta cu hopi biaha sin ningun clase di respet tin di e bendedornan ta sali ofrece droga manera nada a pasa. Ta hopi keho diariamente tin pa cu benta droga banda di zona turistico entre otro riba beach durante dia. Anochi ta riba e area cu turistanan ta cana tegenover di e hotelnan. Por bisa cu e personal di strandpolitie a haci un tremendo trabou hunto cu e Polisnan di Noord. E cuater sospechosonan a bay warda di Strand Politie pa asina e proceso di investigacion cu interogacion continua.