A gara nuebe ilegal cu a subi tera y a intercepta boto rumbo Venezuela

E radarkamer di Cuerpo Policial a capta un señal di un boto biniendo for di paseit direccion Aruba. Mesora a dirigi e patruyanan di San Nicolas pa bay tira bista den e area di Santana di Cacho. Na yegada di polis, a topa cu por lo menos diesdos persona riba e barancanan entre Santana di Cacho cu Baby Beach.

No tabatin mucho polis na sitio na e momento ey, pues a hacie dificil pa a gara tur. A logra detene por lo menos ocho di nan na sitio. Algun a sigui drif bay direccion di Baby Beach. A pidi refuerso mesora di e unidadnan di Santa Cruz, Playa, K9 y e helicopter di polis.

EXCLUSIVO: Ilegal a subi tera. Accion grandi den area di Santa di Cacho

Posted by 24ora on Monday, January 10, 2022

Mas of menos un ora despues a logra gara un otro persona un poco mas pariba di Big Mama Grill. Ora a deten’e, el a conta polis cu; tin por lo menos cuater persona mas scondi den mondi.

Berdad, cu ayudo di e helicopter di polis, a gara un mas den e mondi unda a gara e di nuebe persona indocumenta. Pues, te unda cu nos di 24ora.com por a conta, a mira dies persona total deteni.

Otro detencion mas pa ilegal cu a subi tera. Mientrastanto e helicopter a capta e boto cu a trece e ilegalnan y indica wardacosta pa asina captura esaki.

Posted by 24ora on Monday, January 10, 2022

Segun informacion oficial di Cuerpo Policial, ta solamente nuebe nan a detene. E helicopter hunto cu e metal shark di wardacosta, a cuminsa bay direccion zuid. E helicopter di polis a señala un boto bayendo ‘full speed’ direccion Venezuela.

A informa wardacosta di e boto y a logra intercept’e tres miya pazuid di Aruba. A deten’e e capitan y a entreg’e na e recherchenan di e Unit di mensenhandel mensensmokkel kende lo continua cu e proceso investigativo. No ta descarta cu den oranan di mainta por detene mas persona indocumenta den Sero Colorado. Na final tin cu aplaudi y e forma con rapido Cuerpo Policial y e personal di wardacosta a traha, bon trabou!