Awe mainta Parlamentarionan Rocco Tjon y Edgard Vrolijk di e Fraccion di MEP a entrega un ley di iniciativa pa cambia e “loterijverordening”. Esencia di e cambio ta pa bira posibel pa un di dos instancia haya permiso pa organisa weganan di Lotto. Cu esey Parlamento lo kita e “monopolio” cu awor ta existi pa Fundacion Lotto pa Deporte y habri e mercado pa mas fundacion por organisa e weganan di Lotto aki. Ki implicacion legal e cambio aki lo tin pa Gobierno, no ta conoci awor aki.
MOTIBONAN PA CAMBIA E LEY ACTUAL
Fundacion Lotto pa Deporte (FLPD) no ta contestando preguntanan di Parlamento y asina ta impedi e organo pa eherce nan trabou debidamente., asina Rocco Tjon a duna di conoce hustificando dicon e ley di iniciativa aki. Ora ta trata presupuesto ta importante pa Parlamento tin tur informacion pa por tuma e miho decision pa alocacion di fondo pa deporte. Sinembargo FLPD ta nenga rotundamente pa contesta e preguntanan, segun e lider di Fraccion di MEP den Parlamento.
Na di dos luga, ta obvio cu mantencion di diferente facilidad deportivo ta laga di desea. Consecuentemente nos seleccion nacional di futbol no por competi na Aruba den nos stadionnan. Debi na e hecho cu mantencion no ta tuma luga.
ENFOKE DI E DI DOS FUNDACION
Manera e ley di iniciativa ta prescribi, e enfoke di e fondonan cu e di dos fundacion lo genera mester ta riba mehoracion di facilidadnan existente y amplia posibilidadnan pa hobennan por haci deporte. E ampliacion aki mester ta den tur districto di Aruba. Adicional tur fondo mester wordo uza pa deporte den e sentido mas amplio di e palabra. Es decir, stimula deporte na scol, den bario pero tambe bou nos hendenan grandi. Tur esaki segun ta ancra den e programa di gobernacion y e plan di maneho di Minister Dangui Oduber.
PA CONCLUI
“Locual ta mas importante ta cu practicanan manera FLPD ta haci door di secuestra deporte y frustra un Gobierno pa ehecuta nan maneho lo ta pa pasado”, segun Rocco Tjon. E Parlamentario ta convenci cu e di dos fundacion aki no lo por wordo secuestra door di ningun partido politico.
