No ta un ni dos, sino un total di 9 acusacion penal cu a entrega contra ex-Minister Otmar Oduber, naci dia 7 di augustus 1972 y cu tabata encarga cu maneho di infrastructura y medio ambiente. Ta acus’e di corupcion, di maluza su posicion y su poder, di a enrikece y beneficia su mes, di a tuma soborno, a comete fraude cu impuesto, labamento di placa y di a funda y forma parti di un organisacion criminal!
Esun cu a entrega e keho ta Alfred “Michael” Williams di Fundacion Nos ta Aruba. E no ta unico pasobra algun tempo pasa e organisacion Rainbow Warrios di Milton Ponson tambe a entrega keho. Mescos tambe e politico Booshi Wever di partido UPP tambe a keha e ex-mandatario di e mesun tipo di actonan dudoso, di cual a sugeri Ministerio Publico pa investiga si tabatin of tin actonan fraudulento of coruptivo den e “dealnan” cu e ex-Minister a cera cu hendenan yega na dje of na su partido.
A entrega e keho diahuebs ultimo, dia 25 di mei y tabata dirigi na Fiscal W. Gerretschen na Ministerio Publico. Tambe, pa evita cu e keho ta keda den lachi warda, e fundacion a manda copia di e keho den un carta oficial na Prome Minister Mark Rutte di Hulanda y na Secretario di Estado, Ronald Knops, encarga cu asuntonan di Relacionnan den Reino Hulandes. A copia Gobernador, Representante di Hulanda na Aruba, Palamento di Hulanda, Parlamentario Andre Bosman, Parlamentario Ronald van Raak, Parlamento di Aruba, na CAft di Aruba, na UN Convention against Corruption, na CDBC di Hulanda, na Transparency International y e grupo di Parlamento contra corupcion (GRECO).
Loading…
Reload document 
Open in new tab E keho ta bin riba un “timing” net na momento tambe cu Andre Bosman, Parlamentario di Hulanda, a avisa cu tin politiconan na Aruba lo bay cera y a menciona specificamente Serlimar. Esey net despues cu e compania estatal a haya status di “surseance van betaling” debi cu e ta den bancarota, probablemente dor di mal maneho bou liderazgo di Otmar Oduber mes como Minister. Tambe den fin di siman e Parlamentario Hulandes a bisa di lo publica mas informacion e siman aki tocante Serlimar y a pidi pa publico di Aruba suministra mas informacion na dje. Asina por mira cu for di Hulanda, aki na Aruba mes y den politica, ta cerando e circulo rond di e ex-Mandatario, cu awendia ta traha un rato como “consultant” pa Gobierno y otro rato pa otro companianan yega na dje, manera Aruba Airlines.
Loading…
Den un prome reaccion na e portal di noticia “Noticia Cla”, e ex-Minister a bisa cu tur locual e fundacion a bisa ta “non sense” y cu no ta cuadra cu berdad. Mas bien e ta consider’e un campaña di difamacion contra dje, aunke cu for di aña pasa caba el a retira for di politica activo.
Separa di e keho contra Otmar Oduber, tambe den e mesun keho ta acusa amigonan comerciante yega na e mandatario, manera ta Luis Cano, Gigi Helder, Harry Koeman, e rumannan Neme, Errol Henriquez y e ex-bankero Alwyn Lin.
