A entrega e di 1 mion karchi di kùr pa vehíkulo motorisá entre aña 2000 pa 2018

Servisio pa Tráfiko i Transporte (UOVV) a entrega e di 1 mion karchi di kùr pa vehíkulo motorisá awe 3 di desèmber 2018. E kantidat aki ta di e periodo entre aña 2000 te ku awor 2018.

E shofùr konserní a risibí su karchi di kùr number 1.000.000 serka Minister Jesus-Leito, i e direktor di UOVV, Sr. Melvin Doran, huntu ku demas koleganan di UOVV. Na kambio di milenio a hasi un transishon di e sistema ku tabata wòrdu usá pa un sistema nobo. Tur registrashon a haña un number nobo administrativamente. Tur trahadó di e departamentu tabata den espektativa pa ora e momentu partikular aki yega. Trahadónan a mustra nan satisfakshon pa ku e meta lográ i e shofùr lógikamente kontentu di por a risibí atenshon èkstra. Tur aña míles di vehíkulo ta pasa na e servisio aki pa asina por kumpli ku un di e reglanan stipulá, esta pa kada dos aña laga kùr vehíkulonan partikular i kada aña pa vehíkulonan pisa.

UOVV ta demostrando su derechi di eksistensha i ta konsientisá kada suidadano kon importante ta pa laga kùr nan vehíkulo na tempu. Esaki ta pa halsa seguridat di kada outomobilista riba kareteranan di Kòrsou. UOVV ta hasi lo máksimo pa ofresé un bon servisio na tur outomobilista ku ta bai kùr nan vehíkulo i ta spera di komunidat ku nan kumpli ku nan obligashon dor di laga kùr nan vehíkulo i evitá problema. Pa mas informashon tokante VV, por yama òf whats app na +5999511-8582. Pa tur informashon i desaroyo di Ministerio di Tráfiko, Transporte i Planifikashon Urbano (VVRP) por bishita e website na www.vvrp.cw, facebook página MinisterieVVRP i instagram MinisterieVVRP.