A eligi Monica Kock como presidente di Camara di Comercio

Ayera directiva di Camara di Comercio a reuni y ey a eligi Monica Kock, abogado conoci den comunidad, como e siguiente presidente di Camara di Comercio. E funcion ta pa un aña largo y pa e prome reunion di directiva na januari 2023 lo mester bolbe eligi un presidente nobo. Ta pa prome bes cu Kock ta na timon di e organisacion, despues cu Omar Tromp a dirigi KVK durante dos termino sigui. El a avisa di trempan cu e no ta reeligibel pa un di tres periodo.

Monica Kock ta encabesa e organisacion precisamente na un momento di hopi reto den nos pais. Gobierno di Aruba ta bou presion enorme di Gobierno di Hulanda pa falta di cumplimento. CAft y COHO ningun tin un bon palabra pa e forma con Aruba ta keda sin cumpli cu acuerdonan firma. Comercio ta sinti falta di liderazgo y guia di parti di gobierno, den hiba nos economia den e rumbo corecto di desaroyo y crecemento.

Como cu na cas mes gobierno no ta capas di tuma medidanan necesario pa contene contagio di Covid-19, ta nota cu Merca mes ta tuma decisionnan pa nos, cu consecuencia cu awor a duna conseho negativo pa Mericanonan biaha pa Aruba. Esey a causa un caida drastico den reservacionnan pa bin pasa vakantie riba nos isla, sea den forma di famia of gruponan grandi. Tur esey ta traduci den menos entrada den nos economia.

Camara di Comercio e ultimo tempo a tuma un posicion neutral y a opta pa keda keto riba un cantidad di desaroyo den nos pais. Cu cambio di presidencia, lo mester midi si lo bin cambio den e actitud y bos cu Camara di Comercio tin normalmente den comunidad.